ޗައިނާއާމެދު ދޮގު ވާހަކަތައް ފަތުރާ މީހުންގެ މައްސަލަ ބަލައިދިނުމަށް ޗައިނާ އެމްބަސީން ދިވެހި ސަރުކާރުގައި އެދިއްޖެއެވެ.

ޗައިނާ އެމްބަސީން މިއަދު ނެރެފައިވާ ބަޔާނެއްގައި ބުނެފައިވަނީ ޗައިނާ އާއި ރާއްޖެއާ ދެމެދު އޮތް ގާތް އެކުވެރި ގުޅުމަށް ހީނަރުކަން ލިބޭ ގޮތަށް، އެ ގައުމާ ދެކޮޅަށް ރާއްޖޭގެ ބައެއް ފަރާތްތަކުން ދޮގު ވާހަކަތަކެއް ފަތުރަމުންދާ ކަމަށެވެ.

އެހެންކަމުން އެފަރާތްތަކުގެ މައްސަލަ ބައްލަވައި ދެއްވުމަށް ދިވެހި ސަރުކާރުގައި އެދިފައިވާނެ ކަމަށް ޗައިނާ އެމްބަސީން ވަނީ ބުނެފައެވެ.

ޗައިނާ އެމްބަސީގެ ބަޔާނުގައި ބުނެފައިވަނީ އެޤައުމުން އަބަދުވެސް ގެންގުޅެނީ ގައުމުތަކުގެ ދާހިލީ ކަންކަމުގެ ތެރެއަށް ނުވަނުމުގެ އުސޫލު ކަމަށެވެ. ނަމަވެސް ރާއްޖެ އާއި ޗައިނާއާ ދެމެދު އޮންނަ ގާތް ގުޅުން ހީނަރުކުރުމަށް އަމާޒުކުރަމުންދާ ނުރައްކާތެރި ހަމަލާތަކެއް ފާހަގަކުރެވިފައިވާ ކަމަށް އެބަޔާނުގައިވެއެވެ.

ޗައިނާ އެމްބަސީގެ ބަޔާނުގައި އިތުރަށް ބުނެފައިވަނީ ޗައިނާއިން ރާއްޖޭގައި ކޮށްފައިވާ ކަންކަމަކީ، ރާއްޖޭގެ އިގްތިޞާދީ އަދި އިޖުތިމާއީ ކުރިއެރުމަށް އެހީތެރިވެދިނުމުގެ މަސައްކަތްތައް ކަމަށެވެ. އަދި އެޤައުމާމެދު ދޮގު ވާހަކަތަކެއް ފަތުރައިގެން ރާއްޖެ އާއި ޗައިނާގެ ގުޅުން ހީނަރުކުރަން އުޅޭ މީހުންނަށް އެކަން ކާމިޔާބު ނުވާނެ ކަމަށް ވެސް އެ ބަޔާނުގައި ބުނެފައިވެއެވެ.

ޗައިނާ އެމްބަސީން މިފަދަ ބަޔާނެއް ނެރެފައިވާއިރު ރިޔާސީ އިންތިހާބާ ގުޅިގެން ރާއްޖޭގެ މީޑިއާއަކަށް ޗައިނާ އިން ފައިސާ ދިން ކަމަށްބުނާ ޚަބަރުތަކެއް މީސްމީޑިއާގައި ދަނީ ދައުރުވަމުންނެވެ.