މާލެއިން މެދު ރާއްޖެ ތެރޭގެ ރަށަކަށް ދިޔަ ކޮވިޑް-19 އަށް ޓެސްޓް ނުކުރާ މީހަކު ބައްޔަށް ޕޮޒިޓިވް ކަމަށް އެޗްޕީއޭ އިން އެންގުމުން އާއިލާއަށް ކުއްލި ސިހުމެއްލިބިއްޖެއެވެ.

ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއިކުރައްވައި އެ އެއަންހެންމީހާ ކަރަންޓީނު ކުރުމަށް ނެރުނު އެންގުމުގައި ބުނެފައިވަނީ އޭނާ ކަރަންޓީނު ކުރަނީ ކޮވިޑް-19 އަށް ޕޮޒިޓިވް ވުމާއި ގުޅިގެން އެބައްޔަކީ ހަލުވި ކަމާއެކު ފެތުރެމުންދާބައްޔަކަށްވާތީ އިތުރަށް ބަލަންޖެހޭ ބެލުންތައް ބެލުމަށް ކަމަށެވެ.

ފ. ޢަތޮޅު ރަށަކަށް ނިސްބަތްވާ އެ އަންހެންމީހާ ޑޮކުޓަރަށް ދެއްކުމަށް މާލެ އައިސް ރަށައްދާން ހުއްދަ އަށް އެދުމުން އެޗްޕީއޭ އިން ދިން ލިޔުމަކީ އެ އަންހެންމީހާ ރަށައް ގޮސް ކަރަންޓީނުގައި އެކަހެރިވުމަށް އަންގާ ދޫކުރި ލިޔުމެކެވެ. މާލެ އަށް އަންނަ މީހުން ރަށަށް ގޮސް 14 ދުވަހު ކަރަންޓީނުގައި ތިބެން ޖެހެއެވެ.

ކަރަންޓީނުވާ މީހުން ދޫކޮށްލަނީ 14 ދުވަސްވުމުން ޓެސްޓް ހަދައި ނެގެޓިވްވުމުންނެވެ. އަންހެންމީހާ ކޮވިޑަށް ޕޮޒިޓިވް ކަމަށް އެޗްޕީއޭ އިން އެންގުމުން އާއިލާ އިން އެކަމުގެ ކަންބޮޑުވުން ހިއްސާކުރަން އެޗްޕީއޭއަށް ގުޅުމުން ފޯނަށް ޖަވާބު ނުދޭ ކަމަށް އާއިލާއިން ބުނެފައި ވެއެވެ. އެ އަންހެންމީހާ ޕޮޒިޓިވް ކަމަށް އެންގުމުން މުޅި އާއިލާ އަށް ވަނީ ޝޮކެއް ލިބިފައެވެ.

އެ އަންހެންމީހާ ހުރިގޭގެ ގިނަ ބަޔަކާއި ކޮންޓެކްޓްވެފައިވާތީ އާއިލާގެ ގިނަ މީހުން ވަނީ ބިރުވެރިކަމެއްގެ ތެރޭގައެވެ. އާއިލާ އިން އެކަމުގެ ކަންބޮޑުވުން ހިއްސާ ކުރުމަށާއި މި ވެގެން އުޅޭ ގޮތެއް ސާފު ކުރުމަށް އެޗްޕީއޭއަށް ގުޅުމުން ފޯނަށް ޖަވާބު ނުދޭތީ އާއިލާ އަދިވެސް ތިބީ ބޮޑު ހާސްކަމެއްގެ ތެރޭގައެވެ. އެ އަންހެންމީހާ މާލެ އައިސް ހުރި ގޭގައި މީގެ ކުރިން އެޗްޕީއޭ އަށް "އޮޅިގެން" ނޯޓިސް އެއް ހަރުކޮށް އެގޭ މީހުން ކަރަންޓީނުކޮށްފައި ވެސް ވެއެވެ.

ކޮވިޑާއި ގުޅިގެން އެޗްޕީއޭ އިން މިފަދަ ޒިންމާދާރުކަން ކުޑަކޮށް ކަންތައްތައް ކުރަމުންދާތީ ގިނަ ބައެއްގެ ފާޑުކިޔުން އެޗްޕީއޭ އަށް ވަނީ އަމާޒުވެފައެވެ.