ވަޒީފާއާބެހޭ ގާނޫނުގެ ދަށުން އުފައްދާފައިވާ ވަޒީފާއާބެހޭ ޓްރިބިއުނަލްގެ ރައީސްކަމުގެ މަގާމުން އަމްޖަދު މުސްތަފާ އިސްތިއުފާ ދެއްވައިފި އެވެ.

މީގެ ކުރިން އިލެކްޝަން ކޮމިޝަން (އީސީ) ގެ ނައިބް ރައީސް ކަމުގެ މަގާމުވެސް ފުރުއްވާފައިވާ އަމްޖަދު، ވަޒީފާއާ ބެހޭ ޓްރިބިއުނަލްގެ ރައީސްގެ މަގާމަށް އައްޔަން ކުރައްވާފައިވަނީ މިއަހަރުގެ މާޗް މަހުއެވެ.

އަމްޖަދު އިސްތިއުފާ ދެއްވާފައިވަނީ ބުރާސްފަތި ދުވަހުއެވެ. ބައެއް މީޑިޔާ ތަކަށް މައުލޫމާތު ދެއްވަމުން މަގާމުން އިސްތިއުފާ ދެއްވި އަމްޖަދު މުސްތަފާ ވިދާޅުވީ ވަޒީފާއާ ބެހޭ ޓްރިބިއުނަލްގެ ރައީސްކަމުގެ މަގާމަށް އައްޔަން ކުރެވުނު ހިސާބުން ފެށިގެން ޓްރައިބިއުނަލްގެ އެތެރެއިންނާއި، ބައެއް މެމްބަރުންގެ ފަރާތުން އެކި ކަހަލަ އުނދަގޫތައް ދިމާވަމުން އައި ކަމަށެވެ. ވަޒީފާ އާއި ބެހޭ ޓްރައިބިއުނަލްގައި މައްސަލަ ބެލޭނެ މާހާއުލެއް ނެތް ކަމަށްވެސް އޭނާ ވިދާޅުވިއެވެ.

އޭގެ ސަބަބުން ކުރައްވަމުން ގެންދެވި ގިނަ މަސައްކަތްތަކަށް ގޮންޖެހުންތަކެއް ދިމާވެ އެ މައްސަލަ ރައީސް އޮފީހުގެ ސާމަލުކަމަށް ގެންނެވި ކަމަށްވެސް އަމްޖަދު ވިދާޅުވިއެވެ. އޭނާ ވިދާޅުވީ، އެ މަގާމަކީ އެތައް ރައްޔިތުންނާ ގުޅިފައިވާ މަގާމަކަށްވީ ނަމަވެސް ''ޕްރޮފެޝަނަލް'' ކޮށް މަސައްކަތް ކުރެވޭނެ ޖާގައެއް ޓްރިބިއުނަލްގައި ނެތް ކަމަށެވެ.