މާލޭގެ ތިން މިސްކިތަކުން ކޮވިޑް-19އަށް 8 މީހަކު ޕޮޒިޓިވްވެއްޖެއެވެ.

ކޮވިޑް-19 އަށް މީހުން ޕޮޒިޓިވްވްވެފައިވަނީ މަސްޖިދުލް ސުލްތާން ހަސަން އިއްޒުއްދީން މިސްކިތް (ތޮއިބާ މިސްކިތް) އާއި، މަސްޖިދުލް ސުލްތާން މުހައްމަދު އިމާދުއްދީން (މަޖިލިސް އިދާރާ ކައިރީގައި ހުންނަ މިސްކިތް) އަދި މަސްޖިދުލް އަފީފުއްދީން (ދިއްލީ މިސްކިތް) އިންނެވެ.

ކޮވިޑް-19 އަށް ޕޮޒިޓިވްވި މީހުން ޒިޔާރަތް ކޮށްފައިވާ މިސްކިތްތައް ބަންދުކޮށް އެމިސްކިތްތައް ޑިސްއިންފެކްޓް ކުރުމުގެ މަސައްކަތް މިހާރު ވަނީ ފަށާފައެވެ. ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ.ނަޒްލާ ރަފީގު ވެސް ވަނީ މިސްކިތްތަކުން ކޮވިޑް-19 ކޭސް ތަކެއް ފެނިފައިވާ ކަމަށް ވިދާޅުވެފައެވެ. މިސްކިތްތައް ޑިސްއިންފެކްޓް ކުރުމުގެ މަސައްކަތް ނިމުމުން އަލުން މިސްކިތް ހުޅުވާނެ ކަމަށް ނަޒްލާ ވިދާޅުވިއެވެ.

ކޮވިޑް-19 އާއި ގުޅިގެން މާލޭގެ މިސްކިތްތަކުގައި ޖަމާޢަތުގައި ނަމާދު ކުރުން މަނާކޮށްފައި އޮންނަތާ ހަތަރު މަސް ދުވަސް ވާން ކައިރިވެފައި ވަނިކޮށް މިސްކިތްތައް އަލުން ހުޅުވައިލައި ޖަމާޢަތުގައި ނަމާދު ކުރުމުގެ ހުއްދަ ދިނީ މިމަހުގެ 01 ވަނަ ދުވަހުއެވެ.