ކުރީގެ ހައުސިން މިނިސްޓަރ ޑރ. މުހައްމަދު މުއިއްޒު ވަޒީރުކަން ގެއްލުނުފަހުން ފާއިތުވެގެން މިދިޔަ ދުވަސްތަކުގައި ހުޅުމާލެއިންނާއި، މާލެއިން ތަނަވަސްކަމާއިއެކު ގެދޮރުވެރިކަމަށް ފައިސާ ހޯދާގޮތެއް ބަލަންޖެހޭކަމަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ވިދާޅުވެއްޖެއެވެ.

ސިފައިންނާއި، ފުލުހުންގެ އާއިލާތަކަށް ބޯހިޔާވަހިކަން ފޯރުކޮށް ދިނުމަށް 2013 ވަނަ އަހަރު މަސައްކަތްފެށި 600 ފްލެޓް ނުނިމި ލަސްވާ މައްސަލާގައި މަޖިލީހުގައި ވާހަކަ ދައްކަވަމުން އިލިޔާސް ލަބީބު ވިދާޅުވީ ފައިސާއާއި ތަނަވަސް ކަމަކީ މީހާގެ މަޤާމާއި، ކުރާ މަސައްކަތުން ލިބޭ އެއްޗެއްކަމަށެވެ. ނަމަވެސް މިއަދު އެއްވެސް މަސައްކަތެއް ނުކޮށް ދެއަތް އުރާލައިގެން ތިއްބެވި ބޭފުޅުންނަށްވެސް ބޮޑެތި ރޯހައުސް ލިބި، ގެތަށް ބުރިބުރިއަށް އަރަމުންދާތަން ފެންނަކަމަށް އޭނާ ވިދާޅުވިއެވެ.

ސަލާމަތީ ބާރުތަކުގެ އާއިލާތަކަށް ބޯހިޔާވަހިކަން ފޯރުކޮށް ދިނުމަށް ހުޅުމާލޭގައި އަޅަމުންދާ ފްލެޓް ތަކުގެ މައްސަލާގައި ކުރީގެ ހައުސިން މިނިސްޓަރ މުއިއްޒަށް ވަރަށް ބޮޑަށް ފާޑުވިދާޅުވަމުން އިލިޔާސް ވިދާޅުވީ މިމަސައްކަތްކުރި ނޫމަޑީގެ އެއްބަސްވުން، ވެރިކަމާއި ހަވާލުވެ ވަޑައިގެން ބާތިލު ކުރެއްވީ މުއިއްޒުކަމަށެވެ. އަދި ބާތިލް ކުރުމަށްފަހު ކޯޓަށް ވަޑައިގެން ބާތިލް ކުރެއްވުނީ ގާނޫނާއި ޚިލާފަށްކަމަށް ވިދާޅުވެ ބޮޑު ޖަރީމާއެއް ހިންގާފައިވާކަމަށް އޭނާ ވިދާޅުވިއެވެ.

"ވަރަށް ސާފުކޮށް އަޅުގަނޑު މިދަންނަވަނީ މުއިއްޒު މިނިސްޓަރުކަމަށް އައިސްފަ ރަނގަޅަށް ހިނގަހިނގާހުރި މަސައްކަތްތައް ހުއްޓުވާލާފަ. ކޮންޓްރެކްޓްތައް ކެންސްލްކޮށްފަ، ކޯޓަށް ގޮސް ބުނީ ތިމަންނަ ކޮންޓްރެކްޓް ކެންސަލްކުރީ ގޯސްކޮށޭ. ބަޔަކު ބުނެގެންވެސްނޫން. އަމިއްލަޔަށް ގޮސް މުއިއްޒު އެކަންކުރީ." ހުޅުދޫ ދާއިރާގެ މެންބަރު އިލިޔާސް ލަބީބު ވިދާޅުވިއެވެ.

މުއިއްޒު އަށް ބޮޑެތި ތުހުތަތުތަކެއް ކުރައްވަމުން އިލިޔާސް ވިދާޅުވީ މިއަދު ތަނަވަސްކަމާއި ފައިސާ ހޯދަމުންދާގޮތް ބަލަންޖެހޭކަމަށެވެ. މާލޭގައި ހުންނަ ގެ، 15 ބުރިއަށް ނަގައި، ހުޅުމާލެއިން ރޯހައުސްއެއް 5 މިލިޔަން ރުފިޔާ ދައްކާފައިވާ ނެގުމަކީ ބަލަންޖެހޭކަމެއްކަމަށެވެ.

"ބައެއް ބޭފުޅުން ވިދާޅުވެއްޖެ މުއްއިއްޒު ވަޒީރުކަން ނިމުނުފަހުން ހުޅުމާލެއިން 5 މިލިޔަން ރުފިޔާގެ ބޮޑު ރޯހައުސްއެއް ގަނެފައިވާ ކަމަށް. ކޮންތާކުން ހޯދި ލާރިއެއްތޯ؟ މާލޭގައި ހުރި ގެ ލޯނުނަގައިގެން 15 ބުރިއަށް 14 ބުރިއަށް ހަދާއެބަ. ކޮންތާކުންތޯ ލާރިނެގީ. މިމައްސަލަ ބަލާ މިހާރުވެސް ތަހުޤީގު ކުރަންޖެހޭ. ސީދާ ރިޝްވަތު ނަގައިގެން މިނިސްޓަރުކަމުގައި ހުންނަވައިގެން މިހުރިހާ ކަމެއްކުރީ" ހުޅުދޫ ދާއިރާގެ މެންބަރު އިލިޔާސް ލަބީބު ވިދާޅުވިއެވެ.

ސިފައިންނާއި، ފުލުހުންގެ އާއިލާތަކަށް ބޯހިޔާވަހިކަން ފޯރުކޮށް ދިނުމަށް 2013 ވަނަ އަހަރު ފެށި މަޝްރޫޢުއަކީ 24 މަސްދުވަހުގެ ތެރޭގައި ނިންމުމަށް ހަވާލުކުރެވުނު މަޝްރޫޢުއެކެވެ. މިހާތަނަށް 85 މަސްވެގެން ދިޔައިރުވެސް މަސައްކަތް އަދިވެސް ނިމިފައެއް ނުވެއެވެ.