ރައީސް އިބްރާހިމް މުހައްމަދު ޞާލިހުގެ ނާޤާބިލްކަމާއި، މިސަރުކާރުގެ ދޯހަޅި ސިޔާސަތުގެ ސަބަބުން ޤައުމުގެ މިނިވަންކަން ނުރައްކާތެރި ފައްތަރަކަށް ވެއްޓިފައިވާކަމުގައި އެމްޑީޕީގެ ކުރީގެ ރައީސް ޑރ.މުހައްމަދު މުނައްވަރު ވިދާޅުވެއްޖެއެވެ.

މިނިވަން ދުވަހާއި ގުޅިގެން ޤައުމު މިއަދު އޮތް ހާލަތާމެދު ކަންބޮޑުވެ ވަޑައިގެން ކުރެއްވި ޓްވީޓެއްގައި، ޑރ.މުނައްވަރު ވިދާޅުވީ ޤައުމުގެ ކަންކަން މިއަދު ހިނގަމުންދާ ގޮތުން މިނިވަންކަމަށް ނުރައްކާވާ ހިސާބަށް ކަންކަން ގޮސްފައިވާކަމަށެވެ.

ރާއްޖޭގެ މިނިވަންކަން ދެމެހެއްޓޭނީ ހަރުދަނާ ސިޔާސަތުތަކާއިއެކު ޤައުމުގެ މިނިވަންކަން ރައްކާތެރި ކުރެވޭނެ ވަރުގެ އަޒުމާއި ހިތްވަރު ހުރި ބަޔަކު ތިބެގެންކަމަށް މުނައްވަރު ވިދާޅުވިއެވެ. ނަމަވެސް މިއަދުގެ ނާޤާބިލް ސަރުކާރުގެ ސަބަބުން ޤައުމުގެ މިނިވަންކަމަށް ބުރޫއަރައި އިސްތިޤުލާލު ގެއްލެމުންދާކަމަށް މުނައްވަރުވަނީ ފާހަގަ ކުރައްވާފައެވެ.

"މިއީ ހިތާމަވެރި މިނިވަން ދުވަހެއް. މި ނާގާބިލް ސަރުކާރުގެ ސަބަބުން ރާއްޖޭގެ މިނިވަންކަން އޮތީ ނުރައްކަލެއްގައި، އަޅުގަނޑުމެންގެ މިނިވަންކަމާއި އިސްތިގްލާލައި، ދައުލަތެއްގެ ގޮތުގައި އަމިއްލައަށް ގޮތް ނިންމުމުގެ ހައްގު ދިފާއު ކުރުމަށް އަޅުގަނޑުމެން މަސައްކަތް ކުރަން އެބަ ޖެހޭ." ޑރ. މުނައްވަރު ވިދާޅުވިއެވެ.

ސިޔާސީ ކަންކަމާއި މުޅިން އެކަހެރިވެވަޑައިގެން ދުރުގައި އުޅުއްވާތާ ދުވަސްތަކެއް ފަހުން، މި ސަރުކާރަށް މިހާ ފާޅުކަން ބޮޑުގޮތެއްގައި ފާޑުވިދާޅުވެ ޓްވީޓެއް ކުރެއްވި މިއީ ފުރަތަމަ ފަހަރެވެ. މުނައްވަރަކީ އެމްޑީޕީ އުފެއްދުމުގައިވެސް އިސްދައުރެއް އަދާކުރައްވާފައިވާ އަދި އެމްޑީޕީ ހިންގުމުގައިވެސް އިސްދައުރެއް އަދާކުރެއްވި ބޭފުޅެކެވެ. ނަމަވެސް ފަހަކަށް އައިސް މުނައްވަރު ސިޔާސީ ހަރަކާތްތަކުން އެއްގޮތަކަށްވެސް ނުފެނެއެވެ.