މިހާރު ފެންނަ ކޯވިޑް-19ގެ ޕޮޒިޓިވް ކޭސްތަކަށް ބަލާއިރު، ޕޮޒިޓިވްވާ ދިވެހިންގެ ކޮންޓެކްޓްސް އާދަޔާ ޚިލާފަށް ގިނަކަމުގައި އެޗްޕީއޭގެ އެޕިޑެމިއޮލޮޖިސްޓް ޑރ. އިބްރާހިމް އަފްޒަލް ވިދާޅުވެއްޖެއެވެ.

ނެޝަނަލް އިމަޖެންސީ އޮޕަރޭޝަން ސެންޓަރުގައި ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އަފްޒަލް ވިދާޅުވީ މިހާރު ފެންނަ ކޭސްތަކުގެ ތެރޭގައި ނިސްބަތުން ގިނައީ ދިވެހިން ކަމަށެވެ. މިހާރު އިތުރުވެފައިވާ ކޭސްތަކުގެ ތެރޭގައި ބަލީގެ އަލާމާތްތައް ހުންނަ މީހުން ވެސް ގިނަކަން ޑރ. ޢަފްޒަލް ފާހަގަކުރެއްވިއެވެ.

މިހާރު ބަލިޖެހޭ މީހުންގެ ތެރެއިން ނިސްބަތުން އެންމެ ގިނައީ ފިރިހެނުން ކަމަށްވެސް އަފްޒަލް ވިދާޅުވިއެވެ.

އުމުރުފުރާތަކަށް ބަލާނަމަ، ބަލި ޖެހޭ މީހުންގެ ތެރޭގައި އެންމެ ގިނައީ 18 އަހަރާ 45 އަހަރާ ދެމެދުގެ މީހުން ކަމަށާއި ކޮންޓެކްޓުންގެ ތެރޭގައި ގިނައީވެސް މި އުމުރު ފުރާގެ މީހުން ކަމަށް ޑރ. އަފްޒަލް ވިދާޅުވިއެވެ. އަދި މި ފަހަކަށް އައިސް އެއްވެސް ކްލަސްޓާއަކާ ގުޅުން ނެތް ކްލަސްޓަތައް ފެންނަ މިންވަރުވެސް އިތުރުވަމުންދާކަމަށް އަފްޒަލް ވިދާޅުވިއެވެ.

އެކްޓިވް ކޭސްތަކަށް ބަލާއިރުވެސް، ދިވެހިންގެ ނިސްބަތް، ކުރިއާ އަޅާބަލާއިރު ވަރަށް ބޮޑަށް އިތުރުވެފައިވާކަމަށް ޑރ. އަފްޒަލް ވިދާޅުވިއެވެ.

"ކުރިއަށް އޮތްތަނުގައި ހާލަތު މިއަށްވުރެވެސް ގޯސްވުމަކީވެސް އެކަށީގެންވާކަމެއް. ދިވެހިން އެބަޖެހޭ ތަންކޮޅެއް ބޮޑަށް ސަމާލުވެ، އަޅުގަނޑުމެން ދޭ އިރުޝާދުތަކާ، ބަލިން ރައްކާތެރިވުމަށް އަޅަންޖެހޭ ފިޔަވަޅުތަކަށް އިތުރަށް ސަމާލުކަން ދޭން." ޑރ. އަފްޒަލް ވިދާޅުވިއެވެ.

ރާއްޖެއިން 3،302 މީހުން ކޯވިޑް-19 އަށް ޕޮޒިޓިވް ވެފައިވާއިރު މީގެ ތެރޭގައި 1،488 ދިވެހިން ހިމެނޭ ކަމަށް އެޗްޕީއޭ އިން ހާމަކުރެއެވެ.