ގާނޫނީ ތަރަހައިގެ ތެރެއިން ހާލަތާއި އެކަށޭނަ ގޮތަށް ޚިޔާލު ފާޅު ކުރުމަށް ފުލުހުންގެ އިދާރާ އިން މިރޭ އިލްތިމާސްކޮށްފިއެވެ.

އިދިކޮޅު ފަރާތްތަކުން މާލޭގައި ސިލްސިލާކޮށް މުޒާހަރާ ބާއްވަން ތައްޔާރުވަމުންދަނިކޮށް ފުލުހުންގެ އިދާރާ އިން މިރޭ ނެރުނު ނޫސްބަޔާނެއްގައި ބުނެފައިވަނީ ހެލްތު ޕްރޮޓެކްޝަން އެޖެންސީގެ އެންގުންތަކާ ހިލާފަށް މަގުމައްޗަށް އެއްވެ، އިޖުތިމާއީ ގައިދުރުކަމަށް ބެލުމެއްނެތި، ބައެއް މީހުން މާސްކްވެސް ނާޅާ އެއްވުންތައް ކުރިއަށް ގެންދާކަން ފާހަގަ ކުރެވިފައިވާކަމަށެވެ.

އަދި މިވަގުތަކީ ކޮވިޑް-19 އަށް ރާއްޖެއިން މީހުން ފައްސިވާ އަދަދު އިތުރުވަމުންދާ ދުވަސްވަރަކަށް ވުމާއެކު، މަގުމައްޗަށް ނުކުމެ އުޅުމުގައި، ސިއްހީ ގޮތުން ރައްކާތެރިވުމަށް ދެވިފައިވާ އިރުޝާދުތަކަށް ސަމާލުކަންދީގެން ހަރަކާތްތެރިވުމަށް އެދޭ ކަމަށް ފުލުހުންގެ ބަޔާނުގައި ބުނެފައިވެއެވެ.

"ފުލުހުންގެ ތެރެއިން ކުރީ ސަފުގައި މަސައްކަތް ކުރާ ފުލުހުންވެސް ފައްސިވާ އަދަދުވެސް އިތުރުވަމުންދާ ދުވަސްވަރަކަށްވެފައި، މަގުމައްޗަށް ނުކުމެ އުޅުމުގައި، ސިއްހީ ގޮތުން ރައްކާތެތިވުމަށް ދެވިފައިވާ އިރުޝާދުތަކަށް ސަމާލުކަންދީގެން ހަރަކާތްތެރިވުމަށް މި ސަރވިސްއިން އިލްތިމާސްކޮށް ހަނދުމަކޮށްދެމެވެ."  ފުލުހުން ނެރުނު ބަޔާނުގައިވެ އެވެ.

މީގެ އިތުރުން ފުލުހުން ވަނީ މުޒާހަރާތައް ކަވަރު ކުރުމުގައި ހަރަކާތްތެރިވަމުންދާ ނޫސްވެރިން މޯލްޑިވްސް ބްރޯޑްކާސްޓިންގ ކޮމިޝަނުން ދޫކުރާ އެކްރެޑިޓް ފާސް އަޅައިގެން މަސައްކަތް ކުރުމަށް އިލްތިމާސްކޮށްފައެވެ. އެއްވުންތައް ކަވަރު ކުރުމުގައި ދިމާވާ ދަތިތައް ޙައްލުކޮށް ވީހާވެސް ގާތުން އެއްވުންތައް ކަވަރު ކުރުމުގެ ފުރުސަތު ފޯރުކޮށްދިނުމުގެ ގޮތުން އެއްވުންތައް ހިނގަމުންދާ ސަރަހައްދު ތަކުގައި ޕޮލިސް މީޑިޔާގެ ފަރާތުން އޮފިޝަލުން ހަރަކާތްތެރިވާނެ ކަމަށް ފުލުހުންގެ ބަޔާނުގައި ބުނެފައިވެއެވެ.