އިނގިރޭސި ވިލާތުގެ ރަސްގެފާނު ޗާލްސްއަށް ކެންސަރުގެ އާލާސްކަންފުޅު ޖެހިވަޑައިގަތުމުން އެމަނިކުފާނަށް އަވަސް ޝިފާއަކަށް އެދިވަޑައިގެން ރައީސް ޑރ. މުހައްމަދު މުއިއްޒު ހާއްސަ މެސެޖެއް ފޮނުއްވައިފި އެވެ.

ޗާލްސް އަށް ކެންސަރުގެ އާލާސްކަންފުޅު ޖެހިވަޑައިގެންފައިވާ ކަމަށާއި، އެ ބައްޔަށް ފަރުވާ ހޯއްދަވަން ފައްޓަވާފައިކަން ބަކިންހަމް ޕެލަސް އިން ވަނީ އިއުލާންކޮށްފައެވެ. ރިޔާސީ ގަނޑުވަރުން ބުނީ ރަސްގެފާނަށް ކެންސަރު ޖެހިވަޑައިގެންފައިވާކަން އެނގިވަޑައިގަތީ ޕްރޮސްޓޭޓް އެންލާޖްމަންޓުގެ ފަރުވާއަކަށް ޑޮކްޓަރަށް ދެއްކެވުމުން ކަމަށެވެ.

އެކަމާ ގުޅިގެން ރައީސް ޑރ.މުޙައްމަދު މުއިއްޒު ވިދާޅުވީ ރަސްގެފާނުގެ އާލާސްކަންފުޅުގެ ހަބަރު އެއްސެވީ ފުންހިތާމައާ އެކުގައި ކަމަށެވެ.

I am deeply saddened to hear the news of the recent health diagnosis of King Charles III. I am confident that His Majesty will tackle this diagnosis with tenacity and resolve. The people of the Maldives join me to wish His Majesty a swift return to vibrant health.

— Dr Mohamed Muizzu (@MMuizzu) February 6, 2024

މި ބައްޔާއިއެކު ރަސްގެފާނު ކެތްތެރިކަމާ ހިތްވަރާއެކު ކުރިމަތިލައްވާނެކަން ޔަގީން ކުރައްވާ ކަމަށް ރައީސް މުޢިއްޒު ވިދާޅުވި އެވެ.

"އަޅުގަނޑާއި ރާއްޖޭގެ ރައްޔިތުން ވެސް ރަސްގެފާނު ޗާލްސްއަށް އަވަސް ޝިފާއަކަށް އެދެމެވެ." ރައީސްގެ މެސެޖްގައި ލިޔުއްވާފައިވެއެވެ.

ރަސްގެފާނު ޗާލްސް ރަސްކަމަށް ވަޑައިގަތީ އެމަނިކުފާނު މަންމާފުޅު، ރާނީ އެލިޒަބަތު ސެޕްޓެމްބަރު 9، 2022 ގައި އަވަހާރަވުމުންނެވެ.