މާލޭގައި މަސައްކަތް ކުރާ ހަ ފުލުހަކު ކޮވިޑަށް ޕޮޒިޓިވްވެއްޖެއެވެ.

ހެލްތު އިމަޖެންސީ އޮޕަރޭޝަން ސެންޓަރު، އެޗްއީއޯސީން ބުނީ މާލޭގައި މަސައްކަތްކުރާ އެ ހަ ފުލުހުން ކޮވިޑަށް ޕޮޒިޓިވްވެފައިވަނީ މިއަދު ކަމަށެވެ. ނަމަވެސް އެކަމުގެ އިތުރު ތަފްސީލެއް ނުދެއްވައެވެ.

ކޮވިޑް-19 އަށް ފައްސިވި ހަ ފުލުހުންނަކީ އެއް ކްލަސްޓާއެއް ކަމެއް ނުވަތަ ނޫންކަމެއް އަދި ސާފުވާގޮތެއް ނުވެއެވެ. ކޮވިޑް-19 އަށް މިހާތަނަށް ޕޮޒިޓިވްވެފައިވަނީ ކިތައް ފުލުހުން ކަމެއް އަދި ފުލުހުން ނުބުނެއެވެ. ނަމަވެސް މިދިޔަ ހަފްތާގައި ފުލުހުން ބުނީ ކޮވިޑް-19 އަށް ފައްސިވާ ފުލުހުންގެ އަދަދު އިތުރު ވަމުން އަންނަ ކަމަށެވެ.

ޖުލައި މަހު މާލޭގެ ފުރަބަންދަށް ލުއިތައް ދިނުމުން ކޮވިޑް-19 އަށް ފައްސިވާ މީހުންގެ އަދަދު ވަރަށް ބޮޑަށް ވަނީ އިތުރުވެފައެވެ. އިއްޔެ ވެސް 74 މީހަކު ކޮވިޑް-19 އަށް ޕޮޒިޓިވްވެފައިވެއެވެ.