އައިޑީކާޑު ހެއްދުމަށް ހުށަހަޅާ ފޯމުގައި މައްސަލައެއް ނެތް ނަމަ، 24 ގަޑިއިރުގެ ތެރޭގައި ކާޑު ލިބޭނެ ކަމަށް ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރް) އިން ބުނެފިއެވެ.

މިދިޔަ އަހަރުގެ ނޮވެމްބަރު 17 ވަނަ ދުވަހާ ހަމައަށް 'ޕެންޑިންގް ފޯމު'ގެ ގޮތުގައި 2378 ފޯމު އޮތްކަން ފާހަގަކޮށް އެ ޑިޕާޓްމަންޓުން ބުނީ، މިދިޔަ މަސް ނިމުނު އިރު އެ ބެކްލޮގް އެއްކޮށް ނިންމާލެވިފައިވާ ކަމަށެވެ.

މީގެ އިތުރުން އެ ޑިޕާޓްމަންޓުން ބުނީ، ޕޯޓަލްގެ މައްސަލަ އަވަސް މުސްތަގުބަލެއްގައި ހައްލު ކުރެވިގެން ދާނެ ކަމަށެވެ.

އާއްމުންނަށް ފަސޭހަ ކޮށްދިނުމުގެ ގޮތުން އެ ޑިޕާޓްމަންޓުން ވަނީ، ދިވެހި ރައްޔިތެއްކަން އަންގައިދޭ ކާޑުގެ ވެރިފަރާތުގެ ސިޓީއެއް ހުށައެޅުމުން އެހެން މީހުނަށްވެސް ކާޑު ނެގޭނެ އިންތިޒާމް ހަމަޖައްސާފައެވެ.

އެ އިންތިޒާމު ހަމަޖައްސާފައި ވަނީ މިދިޔަ މަހުގެ ފަހުކޮޅުގައެވެ.