މިނިމަމް ވޭޖް އެޑްވައިޒަރީ ބޯޑު އަލުން އެކުލަވާލުމަށްޓަކައި އެ ބޯޑަށް ކުރިމަތިލުމުގެ ފުރުސަތު މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ހުޅުވާލައިފިއެވެ.

މަސައްކަތްތެރިކަމާބެހޭ ވުޒާރާއިން މިއަދު ބުނެފައިވަނީ ވިޔަފާރިކުރާ ތަންތަނާއި، އެނޫންވެސް މަސައްކަތްކުރާ ތަންތަނުގައި މުވައްޒަފުން މަސައްކަތް ކުރަމުންދާގޮތް ބަލައި ދެނެގަތުމަށާއި، އެތަންތަނުގައި މަސައްކަތްކުރާ މީހުންނަށް މުސާރައިގެގޮތުން އެންމެ ކުޑަމިނުން ދެވޭނެ އުޖޫރައާ ގުޅޭގޮތުން މިނިސްޓަރަށް ލަފާދިނުމަށްޓަކައި “މިނިމަމް ވޭޖް އެޑްވައިޒަރީ ބޯޑު” އަލުން އެކުލަވާލުމުގެ މަސައްކަތް މިހާރު ފަށާފައިވާ ކަމަށެވެ.

އެގޮތުން އެ ބޯޑުގައި ބައިވެރިވާން އެދޭ ޖަމްޢިއްޔާ ޖަމާޢަތްތަކާއި ވަޒީފާ އަދާކުރާ ފަރާތްތަކުން އެކަމަށް އެދި ކުރިމަތިލުމަށް މިހާރު ވަނީ ހުޅުވާލާފައެވެ.

މިނިމަމް ވޭޖް އެޑްވައިޒަރީ ބޯޑުގައި ޖަމުޢިއްޔާތައް ތަމްސީލު ކުރުމަށް ހުޅުވާލާފައިވާ ދާއިރާތަކުގެ ތެރޭގައި ފަތުރުވެރިކަމުގެ ދާއިރާ ތަމްސީލުކުރާ ޖަމްޢިއްޔާތަކާއި ކޮންސްޓްރަކްޝަން ސިނާޢަތު ތަމްސީލުކުރާ ޖަމްޢިއްޔާތަކާއި އަންހެން ވިޔަފާރިވެރިން ތަމްސީލުކުރާ ޖަމްޢިއްޔާތައް ހިމެނެއެވެ.

އޭގެ އިތުރުން ކުދި އަދި މެދު ފަންތީގެ ވިޔަފާރިތައް ތަމްސީލުކުރާ ޖަމްޢިއްޔާތަކާއި ވަޒީފާ އަދާކުރާ ފަރާތްތައް ނުވަތަ މަސައްކަތްތެރިން ތަމްސީލުކުރާ ޖަމްޢިއްޔާތަކުގެ ތެރެއިން ޝައުގުވެރިވާ ފަރާތްތައް އެކަމަށް އެދި ހުށައެޅުމަށްވެސް ވަނީ ހުޅުވާލާފައެވެ.

މިނިސްޓްރީން ބުނެފައިވަނީ މިނިމަމް ވޭޖް އެޑްވައިޒަރީ ބޯޑުގައި ތަމްސީލު ކުރުމަށް ޝައުޤުވެރިވާ ފަރާތްތަކުން އެކަމަށް އެދޭ ފޯމު 25 މާރިޗު 2024 ގެ 23:59 ގެ ކުރިން މިނިސްޓްރީއަށް ހުށައެޅުމަށް އެދޭކަމަށެވެ.