މިހަފްތާގައި ސަރުކާރު އޮފީސްތައް ބަންދުކުރަން ނިއްމި ނަމަވެސް ކޯޓުތަކުން ޝަރީޢަތްތައް ކުރިއަށް ގެންދަން ޖުޑީޝަލް ސާވިސް ކޮމިޝަން (ޖޭއެސްސީ) އިން ކޯޓުތަކަށް ރޭ އަންގައިފިއެވެ.

ޖޭއެސްސީގެ ރައީސް ހިސާން ހުސައިން ސޮއި ކުރައްވާ ރޭ ކޯޓުތަކަށް ފޮނުއްވެވި ސާކިއުލާއެއްގައި، ކޮވިޑް-19 މުޖުތަމައުތެރޭގައި ފެތުރެމުންދާ ރަށްރަށުގައި ދަށު ކޯޓުތަކުންނާއި އިސްތިޢުނާފު މަރުޙަލާގެ ކޯޓުތަކުން އެކޯޓެއްގެ ފަނޑިޔާރުން ނިންމަވާގޮތެއްގެ މަތިން ޝަރީޢަތްތައް މެދުނުކެނޑި ކުރިއަށް ގެންދިޔުމަށް ވަނީ އަންގަވާފައެވެ.

އަދި ކޮވިޑް-19 ރޯގާ ފެތުރެމުންނުދާ ރަށްރަށުގެ ކޯޓުތަކުގެ ޝަރީޢަތްތައް ޖޭއެސްސީ އިން ކުރިން ނެރެފައިވާ ސާކިއުލާގައިވާ ގޮތުގެމަތިން ކުރިއަށް ގެންދެވުމަށް ވެސް މި ސާކިއުލާގައި ހިސާން ވަނީ އަންގަވާފައެވެ.

ކޯވިޑް-19 ފެތުރުން ކޮންޓްރޯލް ކުރުމަށްޓަކައި، އޮގަސްޓު މަހުގެ 4 ވަނަ ދުވަހުން ފެށިގެން 6 ވަނަ ދުވަހުގެ ނިޔަލަށް ސަރުކާރުގެ އޮފީސްތައް ނުހުޅުވާ ގޮތަށް ރައީސް ސޯލިހް ވަނީ ނިއްމަވާފައެވެ.