މާލޭ ސިޓީގެ މިސްކިތްތައް ސާފުކުރުމުގެ ވަޒީފާއަށް ދިވެހިން ކުރިމަތިލުމަށް މޭޔަރު އާދަމް އާޒިމް އެދިވަޑައިގެންފިއެވެ.

މާލޭ ސަރަހައްދުގެ މިސްކިތްތައް ފޮޅާ ސާފުކުރުމަށް ވަޒީފާއަށް ކުރިމަތިލުމަށް މާލޭ ސިޓީ ކައުންސިލުންް މިހާރު ވަނީ އިއުލާންކޮށްފައެވެ. ދެފަހަރެއްގެ މަތިން މިސްކިތް ފޮޅާ ސާފު ކުރުމުގެ ވަޒީފާއަށް މީހުން ހޯދުމަށް ހުޅުވާލި ނަމަވެސް ވަޒީފާތަކަށް އެކަށީގެންވާ ވަރަށް ދިވެހިން ލިބިފައެއް ނުވެއެވެ.

އެގޮތުން މިސްކިތްތައް ފޮޅާ ސާފުކުރަން 114 ދިވެހިން ބޭނުންވާއިރު ދެ ފަހަރަށް އިއުލާންކޮށްގެންވެސް މިހާތަނަށް ލިބުނީ 14 މީހުން ކަމަށް ސިޓީ ކައުންސިލުން ބުނެއެވެ. އެއީ ކޮންޓްރެކްޓްގެ މުއްދަތު 1 އަހަރަށް އޮތުމުންކަމަށް ފެންނާތީ ސިޓީ ކައުންސިލުން މިހާރު ވަނީ އެ މުއްދަތު 3 އަހަރަށް ބަދަލުކުރަން ނިންމާފައެވެ.

މިކަމަށް ޢިޝާރަތް ކުރަށްވައި މާލޭގެ މޭޔަރު އާދަމް އާޒިމް ވިދާޅުވީ މިސްކިތްތައް ފޮޅާ ސާފުކުރުމަށް އަދިވެސް 110 ޖާގަ އެބަ އޮތްކަމަށެވެ. އެހެންކަމުން އެކަމަށް ކުރިމަތިލުމަށް 2 ޖިންސުންގެ ޒުވާނުންނަށް އާޒިމް ގޮވާލެއްވިއެވެ.

Miskiythakah beynunvaa dhivehi muvazzafun hoadhumah 3 vana faharah iulaan kurevifa. Veehaaves gina dhivehi Anhenun adhi Firihenun mivazeefaa thakah kurimathilun edhen. Dhivehi Raajjeyge miskiythah Dhivehin ge athun saafukoh belehehtumakee libey fahureh adhi ufaleh kamugaa… pic.twitter.com/vwxz8O3YcO

— Adam Azim (@adamazim) March 22, 2024

މޭޔަރު ވަނީ ރާއްޖޭގެ މިސްކިތްތައް ދިވެހިން އަތުން ފޮޅާ ސާފުކުރުމަކީ އުފަލަކަށް ހަދައި އެކަމަކީ ފަހުރެއް ކަމަށް ހެދުމަށް އެދިވަޑައިގެންފައެވެ.

"ރާއްޖޭގެ މިސްކިތްތައް ދިވެހިންގެ އަތުން ސާފުކުކޮށް ބެލެހެއްޓުމަކީ ލިބޭ ފަހުރެއް އަދި އުފަލެއްކަމުގައި ހައްދަވާ." މޭޔަރު އާޒިމް ވިދާޅުވިއެވެ.

މާލޭ ސިޓީ ކައުންސިލުން ކޮށްފައިވާ އިއުލާނުގައި ބުނާގޮތުން މިސްކިތް ސާފު ކުރުމުގެ ވަޒީފާ މުސާރަ އާއި އިނާޔަތްތަކުގެ ގޮތުގައި 12000 ރުފިޔާގެ މުސާރަ އެއް ލިބެއެވެ. މާލޭ ސަރަހައްދުގެ މިސްކިތްތައް ފޮޅާ ސާފުކޮށް ބެލެހެއްޓުމަށް ކުރިމަތިލާން ބޭނުންވާ ފަރާތްތަަކަށް އެފުރުސަތު ހުޅުވާލައިފައިވަނީ މިމަހުގެ 28ގެ ނިޔަލަށެވެ.