އަތޮޅު ތެރޭގެ ދެ ސްކޫލެއްގެ ޖާގަ އިތުރުކުރަން 46 މިލިއަން ރުފިޔާއަށް ދެ ކުންފުންޏަކާ ހަވާލުކޮށްފި އެވެ.

އިއްޔެ ހަވާލުކުރީ ޏ. އަތޮޅު ތައުލީމީ މަރުކަޒުގައި ފަސް ބުރީގެ އިމާރާތެއް އަދި ޅ. އޮޅުވެލިފުށީގައި 10 ކްލާސް ހިމެނޭ ދެ ބުރީގެ އިމާރާތެއް އެޅުމަށެވެ.

އޭގެ ތެރެއިން ޏ. އަތޮޅު ތައުލީމީ މަރުކަޒުގެ އިމާރާތް އަޅަން ހަވާލުކުރީ ޓިކް ޓެކް އިންވެސްޓްމަންޓްއާ އެވެ.

އެ އެއްބަސްވުމުގައި އެޑިއުކޭޝަން މިނިސްޓްރީގެ ފަރާތުން ސޮއި ކުރެއްވީ މިނިސްޓަރ އޮފް ސްޓޭޓް ފޮރ އެޑިޔުކޭޝަން ޑރ. އަހުމަދު މުހައްމަދު އެވެ. އަދި ޓިކް ޓެކް އިންވެސްޓްމެންޓްގެ ފަރާތުން ސޮއި ކުރެއްވީ ޗީފް ފައިނޭންޝިއަލް އޮފިސަރ އިސްމާއިލް ޒަހުރާން ޒުބައިރް އެވެ.

އެ މަސައްކަތް ހަވާލުކުރީ 420 ދުވަސް ތެރޭގައި ނިންމާގޮތަށް، 35,999,991.2ރ އަށެވެ.

އޮޅުވެލިފުށީ ސްކޫލުގެ އިމާރާތުގެ މަސައްކަތް ހަވާލުކޮށްފައިވަނީ ވީއަވަރ އިންވެސްޓްމަންޓް ޕްރައިވެޓް ލިމިޓެޑާއެވެ.

އެ އެއްބަސްވުމުގައި އެޑިއުކޭޝަން މިނިސްޓްރީގެ ފަރާތުން ސޮއި ކުރެއްވީ މިނިސްޓަރ އޮފް ސްޓޭޓް ފޮރ އެޑިޔުކޭޝަން ޑރ. އަހުމަދު މުހައްމަދު އެވެ. އަދި ވީއަވަރ އިންވެސްޓްމެންޓް ޕްރައިވެޓް ލިމިޓެޑްގެ ފަރާތުން ސޮއި ކުރެއްވީ ޕްރޮޖެކްޓް މެނޭޖަރ ސަދީމް އިބްރާހީމް އެވެ.

ވީއަވާއާ އެ މަސައްކަތް ހަވާލުކޮށްފައިވަނީ 365 ދުވަހުގެ ތެރޭގައި މަސައްކަތް ނިންމާގޮތަށް 10,496,362.12 މިލިއަން ރުފިޔާ އަށެވެ.