ފާއިތުވި ހަ އަހަރު ޖިންސީ ގޯނާގެ 2،169 މައްސަލަ ފުލުހުންނަށް ރިޕޯޓްކޮށްފައިވާކަން ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ތައްޔާރުކުރި ރިޕޯޓުން ދައްކައިފިއެވެ.

މިއަދު ކުރިއަށްދާ މަޖިލީހުގެ މިދައުރުގެ އެންމެ ފަހު ޖަލްސާގައި ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެމްބަރު އާދަމް ޝަރީފު ޢުމަރު 2021 ވަނަ އަހަރު ހުށަހެޅުއްވި ޤަރާރަކާ ގުޅިގެން ޖެންޑާ ކޮމިޓީން ތައްޔާރުކުރި ރިޕޯޓެއް ވަނީ އިއްވާފައެވެ.

މަޖިލީހުގެ ރިޕޯޓުން ދައްކާގޮތުގައި ފާއިތުވި ހަ އަހަރުގެ ތެރޭގައި ޖިންސީ ގޯނާގެ ޖުމްލަ 2،169 މައްސަލައެއް ފުލުހުންނަށް ހުށަހެޅިއެވެ.

ރިޕޯޓްގެ ވަކިވަކި ތަފްސީލްތަކަށް ބަލާއިރު ޖިންސީ ގޯނާގެ މައްސަލަތައް އެންމެ ގިނަވީ 2020 ވަނަ އަހަރުއެވެ. އެ އަހަރު 487 މައްސަލައެއް ފުލުހުންނަށް ހުށަހެޅިއެވެ.

އޭގެއިތުރުން 2018 ވަނަ އަހަރު 362 މައްސަލަ އާއި 2019 ވަނަ އަހަރު 410 މައްސަލަ އާއި 2021 ވަނަ އަހަރު 342 މައްސަލަ އާއި 2022 ވަނަ އަހަރު 334 މައްސަލައިގެ އިތުރުން 2023 ވަނަ އަހަރު 234 މައްސަލަ ފުލުހުންނަށް ހުށައަޅާފައިވެއެވެ.

ޖިންސީ ގޯނާކުރުމާއި ރޭޕްގެ މައްސަލަތައް އިތުުރުވެފައިވާތީ މަޖިލީހުން އެކުލަވާލި ރިޕޯޓުން އެނގޭ ގޮތުން 2018 ވަނަ އަހަރުން ފެށިގެން ޖިންސީ ގޯނާގެ 47 މައްސަލައެއް ޕީޖީިން ކޯޓަށް ހުށަހެޅިއެވެ. ނަމަވެސް އޭގެ ތެރެއިން ކުށް ސާބިތުވެފައިވަނީ އެންމެ 10 މައްސަލައެއްގައެވެ. އަދި 8 މައްސަލައެއް ސާބިތުނުވާ ކަމަށް ކަނޑައަޅާފައިވެއެވެ.

ރިޕޯޓުގައި އިތުރަށް ބުނެފައިވަނީ ޖިންސީ ގޯނާކޮށްގެން ފުލުހުންގެ ހިދުމަތަށް ހުށަހެޅޭ ގިނަ މައްސަލަތަކަކީ ޖިންސީ ގޯނާއަށްފަހު ބްލެކްމެއިލް ކުރާ މައްސަލަތައް ކަމަށެވެ.

އޭގެ އިތުރުން ޖިންސީ ގޯނާގެ މައްސަލަތަކުގައި އަނިޔާ ލިބޭ ފަރާތުގެ ހަށިގަނޑުން ތަހުގީގަށް ބޭނުންވާ ހެއްކާއި ޤަރީނާ ނެގުމަށާއި ޑޮކްޓަރުން ބަލަންޖެހޭ ކަންކަން ބެލުމަށް އަނިޔާ ލިބޭ ފަރާތް ސިއްހީ ހިދުމަތްދޭ ތަނަކަށް ގެންގޮސް ހަދަންޖެހޭ ޓެސްޓުތައް ހެދޭނެ ވަސީލަތްތައް ގިނަ ރަށްރަށުގައި ޤާއިމުކޮށްފައި ނުވާކަން ވަނީ ފާހަގަކޮށްފައެވެ.