ސައުދީ ރަސްގެފާނު ސަލްމާން ބިން އަބްދުލް އަޒީޒް އާލާސްކަންފުޅާ އުޅުއްވާތީ، އެ މަނިކުފާނަށް އަވަސް ޝިފާއެއް ދެއްވުމަށް އެދިވަޑައިގެން ރައީސް ޑރ. މުހައްމަދު މުއިއްޒު ޙާއްސަ މެސެޖެއް ފޮނުއްވައިފިއެވެ.

ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ މާތް ވެގެންވާ ދެ ހަރަމްގެ ޚާދިމް، ސަލްމާން ރަސްގެފާނުގެ ސިއްހީ ހާލުކޮޅާ މެދު ކަންބޮޑުވެވަޑައިގަންނަވާ ކަމަށެވެ. އަދި، ރަސްގެފާނަށް އަވަސް ޝިފާއެއް ދެއްވާ ފުރިހަމަ ސިއްހަތެއް ދެއްވާތޯ ރައީސް ވަނީ ދުޢާދަންނަވާފައެވެ.

Deeply concerned about the reports of the health of His Majesty @KingSalman, King of Saudi Arabia, and the Custodian of the Two Holy Mosques. On behalf of the Government and people of the Maldives, I wish His Majesty a full and speedy recovery. May Almighty Allah (SWT) bless His…

— Dr Mohamed Muizzu (@MMuizzu) May 24, 2024

ރަސްގެފާނު ސަލްމާން އާލާސްކަންފުޅާ އުޅުއްވާކަން ހާމަކޮށްފައިވަނީ މިދިޔަ އާދީއްތަ ދުވަހު ސައުދީ ރޯޔަލް ކޯޓުންނެވެ. ސައުދީ ރޯޔަލް ކޯޓުން ނެރުނު ބަޔާނުގައި، ރަސްގެފާނުގެ ފުއްޕާމޭގައި އިންފެކްޝަނެއް އުފެދި ފުއްޕާމޭ ދުޅަވެފައިވާކަން ތަހުލީލު ތަކުން އެނގުމާއިއެކު، އެންޓިބަޔޮޓިކްސް ބޭނުންކޮށް ފަރުވާ ހޯއްދަވަމުންދާކަމަށް ބަޔާންކޮށްފައިވެއެވެ.

ސައުދީގެ ކެބިނެޓް ސެޝަނެއްގައި، ރަސްގެފާނު ސަލްމާންގެ އާލާސްކަންފުޅާއި ބެހޭ ގޮތުން ވާހަކަ ދައްކަވަމުން ވަލީއަޙުދް މުޙައްމަދު ބިން ސަލްމާން ވަނީ، ޖިއްދާގައި ރަސްގެފާނު ސިއްހީ ފަރުވާ ހޯއްދަވަމުންދާ ކަމަށާއި، އަދި މިހާރު ރަސްގެފާނުގެ ހާލުކޮޅު ރަނގަޅުވަމުންދާ ކަމަށް ވިދާޅުވެފައެވެ.

ރަސްގެފާނު ސަލްމާން ރަސްކަމަށް ވަޑައިގަތީ 23 ޖެނުވަރީ 2015 ގައެވެ. ރަސްކަމާއި ހަވާލުވެވަޑައިގެން ރަސްގެފާނު ސަލްމާން ގެންދަވަނީ ސައުދީ އަރަބިއްޔާއަށް ތާރިޚީ ބަދަލުތަކެއް ގެންނަވަމުންނެވެ.