ކުރީ ސަރުކާރުން މާލޭ ސަރަހައްދުގެ ރައްޔިތުންނަށް ހިލޭ ގޯތި ދިނުމަށް ހިންގި "ބިންވެރިޔާ" ޕްރޮގްރާމްގެ ދަށުން ގިރާވަރުފަޅުން ގޯތި ލިބުނު މީހުންގެ ތެރެއިން ގުޅިފަޅަށް ގޯތި ބަދަލު ކުރަން ބޭނުންވާ ފަރާތްތަކަށް ބާއްވާ ގުރުއަތު ނެގުން އަންގާރަ ދުވަހު ބާއްވަން ނިންމައިފިއެވެ.

ގިރާވަރު ފަޅުން ދޫކުރި ގޯތިތަކުގެ ތެރެއިން 1،347 ގޯއްޗެއް ގުޅިފަޅަށް ބަދަލުކުރުމަށް މި ސަރުކާރުން އޮތީ ނިންމާފައެވެ. އަދި އެކަމަށް ހުޅުވާލި ފުރުސަތުގައި 2210 ފަރާތަކުން ވަނީ އެގޮތަށް ބަދަލުވާން ބޭނުންވެގެން ހުށަހަޅާފައެވެ.

ހައުސިންގ މިނިސްޓްރީން މިއަދު ބުނީ، މި ގުރުނެގުން އޮންނާނީ މާދަމާ މެންދުރު 12:00 ގައި ދަރުބާރުގޭ ރަންނަބަނޑޭރި މާލަމުގައި ކަމަށެވެ.

މިނިސްޓްރީން ކޮށްފައިވާ އިއުލާނެއްގައި ބުނެފައިވާގޮތުން ގުރުނަގާ ފޮއްޓަށް އަމިއްލައަށް ނަން ލާން ބޭނުންވާ ފަރާތްތަކުން އެ ދުވަހުގެ ހެނދުނު 9:00 އާއި 10:00 އާއި ދެމެދުގެ ވަގުތެއްގައި ހާޒިރުވާން ޖެހެއެވެ. އަދި ލިސްޓުގައި ހިމެނޭ މީހަކަށް ހާޒިރު ނުވެވޭ ނަމަ ނުވަތަ ބަދަލުގައި މީހަކު ފޮނުވަން ބޭނުންވާ ނަމަ އެ މީހެއްގެ މައުލޫމާތު ހިޔާވަހި ޕޯޓަލްގައި އަދާހަމަ ކުރަންވާނެކަމަށް މިނިސްޓްރީން ބުނެއެވެ. އެ މައުލޫމާތު ހުށަހެޅުމަށް ހުޅުވާލާނީ މާދަމާ ހެނދުނު 10:00 އިން ހޯމަ ދުވަހުގެ މެންދުރު 12:00 އަށް ކަމަށް ވެސް މިނިސްޓްރީން ބުނެއެވެ.