މާލެ ސިޓީގައި މާސްކު ނާޅާ އުޅުނު 475 މީހަކު ޖޫރިމަނާކޮށްފައިވާ ކަމަށް އެޗްއީއޯސީން ބުނެފިއެވެ.

ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ މާސްކް ނާޅައިގެން އިއްޔެ 94 މީހަކަށް ނަސޭހަތްދީ، 41 މީހަކު ޖޫރިމަނާ ކުރެވިފައިވާ ކަމަށެވެ. އަދި ޖުމްލަ މިހާތަނަށް މާސްކް ނާޅާ ބޭރުގައި އުޅުނު 475 މީހަކު ޖޫރިމަނާ ކޮށްފައިވާ ކަމަށް ޑރ. ނަޒްލާ ވިދާޅުވިއެވެ.

އަދި ރޭގަނޑު 10:00ން ފަތިހު 5:00ށް ބޭރުގަ އުޅެގެން އިއްޔެ 80 މީހަކު ވަނީ ޖޫރިމަނާ ކުރެވިފައިވާ ކަމަށާއި، 120 މީހަކަށް ނަސޭހަތް ދީފައިވާ ކަމަށް އެޗްޕީއޭ އިން ވަނީ ހާމަކޮށްފައެވެ. އަދި މިގަޑީގައި ބޭރުގައި އުޅެގެން މިހާތަނަށް މުޅި ޖުމްލަ 311 މީހަކު ވަނީ ޖޫރިމަނާ ކޮށްފައި ކަމަށް ޑރ. ނަޒްލާ ވިދާޅުވިއެވެ.

ލޮކްޑައުންގެ ތިންވަނަ ފޭސްގައި ލުއި ދިންފަހުން ގިނަ އަދަދެއްގެ ބަޔަކު ދިޔައީ ކޯވިޑް-19 އަށް ޕޮޒިޓިވްވަމުންނެވެ. އެކަމާގުޅިގެން މި މަހުގެ ފުރަތަމަ ދުވަހުން ފެށިގެން މާލެ ސިޓީގައި މާސްކު އެޅުން ވަނީ މަޖުބޫރު ކޮށްފައިވާއިރު، ރޭގަނޑު 10:00ން ފަތިހު 5:00ށް ވަނީ ކާފިއު އިއުލާން ކޮށްފައެވެ.