މުޒާހަރާތައް ނުހުއްޓި ދިގުލައިގެން ދިއުމުން ބަންގްލަދޭޝްގެ ބޮޑުވަޒީރު ޝެއިޚް ހަސީނާ އިސްތިއުފާދެއްވައި ގައުމު ދޫކުރައްވައި ފިއްލަވައިފިއެވެ.

ބަންގްލަދޭޝްގެ ބޮޑުވަޒީރު ޝެއިޚް ހަސީނާ އިސްތިއުފާދެއްވީ އެގައުމުގައި ގިނަ ދުވަސްތަކެއް ވަންދެން ކުރަމުން ގެންދާ މުޒާހަރާތައް ނުހުއްޓި ދިގުދެމިގެން ގޮސް އެތައް ބަޔަކު މަރުވުމާ ގުޅިގެން ކަމަށް ބެލެވޭ ކަމުގައި ބޭރުގެ މަސްދަރުތަކުން ރިޕޯޓު ކުރެއެވެ.

ފުލުހުންނާއި މުޒާހަރާގެ ބައިވެރިންގެ މެދުގައި އިއްޔެ ހިނގި ކުރިމަތިލުންތަކުގައި މަރުވި މީހުންގެ ތެރޭގައި ފުލުހުންނާއި ސިޔާސީ މީހުންވެސް ހިމެނެއެވެ.

ބަންގްލަދޭޝްގައި ކުރިޔަށްދާ މުޒާހަރާގެ ބައިވެރިން ގޮވާލަމުން ދަނީ އެ ގައުމުގެ ބޮޑުވަޒީރު ޝެއިޚް ހަސީނާ ވަގުތުން ވަގުތަށް އިސްތިއުފާ ދެއްވުމަށެވެ. ހަސީނާގެ އިސްތިއުފާއަށް އެގައުމުގެ ރައްޔިތުން ގޮވާލަމުން ދިޔައީ ސަރުކާރުގެ ވަޒީފާތަކަށް ކޯޓާ ދިނުމުގެ ނިޒާމު ނިމުމަކަށް ގެނައުމަށް ގޮވާލައި މިދިޔަ ޖުލައި މަހު ދަރިވަރުން ފެށި މުޒާހަރާތައް ހޫނުވެ، 200 މީހުން މަރުވުމުންނެވެ.

މުޒާހަރާތައް ހޫނުވެ ބޮޑެތި ލޭއޮޮހޮރުވުންތަކެއް ހިނގަމުންދާތީ ކަމާއިބެހޭ ފަރާތްތަކުން ވަނީ އެގައުމުގައި އިންޓަނެޓް ބޭނުންކުރުން ހުއްޓުވައި، ޝޫޓް އޮން ސައިޓް ކާފިއު އިއުލާނުކޮށްފައެވެ. މުޒާހަރާތަކުގައި ފާއިތުވި ހަފުތާތަކުގައި 11،000 އަށްވުރެ ގިނަ މީހުން ވަނީ ހައްޔަރުކޮށްފައެވެ.