ޕްރޮގްރެސިވް ޕާޓީ އޮފް މޯލްޑިވްސް ޕީޕީއެމަށް 2018 ގެއްލުނީ މުލިއާގޭގައި "ސިހުރުތަށި" ދުއްވަން އުޅުމުން ކަމަށް ފަތުރުވެރިކަމާބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ.

ރައީސް ޔާމީނަށް ފާޑުވިދާޅުވެ މީސް މީޑިއާގައި ޙިއްސާ ކުރެއްވި މެސެޖެއްގައި ފައިސަލް ވިދާޅުވީ 2018 ގައި ޕީޕީއެމް ގެ އޮޑި ފަރަށް އެރީ ޕީޕީއެމްގެ ލީޑަރޝިޕްގެ ގިނަބަޔަކު ދުރަށް ޖައްސައި، މުލިއާގޭގައި "ސިހުރުތަށި" ދުއްވަން އުޅުމުގެ ނަތީޖާއެއްގެ ގޮތުން ކަމަށެވެ. އަދި އެކަން ކުރެއްވުމުގެ މުގުލުގައި ތިއްބެވީ ރައީސް ޔާމީނާއި އެމަނިކުފާނުގެ އަނބިކަނބަލުން ކަމަށް ފައިސަލް ވަނީ ތުހުމަތު ކުރަށްވާފައެވެ.

“ހަޤީޤަތުގައިވެސް އެ އިންތިޚާބުގައި މަނިކުފާނު އަތުގައި މަދީ އަލާއުއްދީނުގެ ވޮއްގަނޑާއި އުދުހޭ މުސައްލައެވެ.” ފައިސަލް ވިދާޅުވެފައިވެއެވެ.

ފައިސަލް ވަނީ 2019 ގައި ޕީޕީއެމްގެ މަޖިލީސް މެންބަރުން ފެއިލްކޮށްލީ ރައީސް ޔާމީން ކަމަށްވެސް ތުހުމަތު ކުރަށްވާފައެވެ. އަދި އެކަން އެގޮތަށް ކުރެއްވީ ދުރާލާރާވައިގެން އެމީހުން އަޅުވެތިކަމުގައި ބޭތިއްބުމުގެ ކެހިވެރި ނިޔަތުގައި ކަމަށް ފައިސަލް ވިދާޅުވިއެވެ.

“އެހާލަތުގައި މަނިކުފާނު ދޫކޮށް ޕާޓީގެ އިސްގިނަ ބަޔަކު ނައްޓާލިއިރު، ހުރިހާ ތަކުލީފެއް އުފުލަން ކެތްތެރިކަމާއެކު ހުރީ އަޅުގަނޑުގެ ބައްޕަ ޢަބްދުއްރަޙީމް ޢަބްދުﷲ އެވެ.” ބައްޕަގެ ދިފާޢުގައި ވާހަކަފުޅު ދައްކަވަމުން ފައިސަލް ވިދާޅުވެފައިވެއެވެ.

ފައިސަލް ވިދާޅުވީ 2019 ވަނަ އަހަރުގެ ނޮވެމްބަރު މަހުގެ 29 ވަނަ ދުވަހު، ވޮޑަމުލާ މައްސަލައިގައި ރައީސް ޔާމީނަށް ކްރިމިނަލް ކޯޓުން 5 އަހަރު ދުވަހުގެ ޖަލު ހުކުމް އިއްވުމުން، ޕީޕީއެމް އާއި ޕީއެންސީގެ ސިޔާސީ މަސައްކަތް ކުރަން 24 ގަޑިއިރު ގަނަތެޅުނީ އަބްދުއްރަޙީމް ކަމަށެވެ.

އެގޮތުން އެމަސައްކަތުގައި ދެޕާޓީގެ މެންބަރުން ގޮވައިގެން ދުވާލު ހަތަރުދަމު، ސަރުކާރު ޒިންމާދާރުކުރުވައި އަވައްޓެރީންނާއި ދުރުތިބީންގެ ދޮޅިދަށަން އަތްލައި ރައީސް ޔާމީންގެ ހައްޤުގައި އަވަދިވަމުން ދިޔައީ އަބްދުއްރަޙީމްކަން ދިވެހި ޤައުމު ހެކިވާނެ ކަމަށްވެސް ފައިސަލް ވިދާޅުވެފައިވެއެވެ.

“އެ ބޮޑު މާސިންގާ ކޯލިޝަން މަނިކުފާނުގެ ޣައިރު ހާޒިރުގައި ބަލަހައްޓަން މަނިކުފާނު ހަވާލު ކުރީ އެއްވެސް ޢިލްމެއް، ހިލްމެއް ނެތް މީހަކާ ތޯއެވެ؟ އެއިރު ހަމަ ބަރާބަރު ދެއްތޯއެވެ.” ރައީސް ޔާމީނަށް ރައްދު ދެއްވަމުން ފައިސަލް ވިދާޅުވިއެވެ.

ފައިސަލް އިތުރަށް ވިދާޅުވީ 2023 ގެ ރިޔާސީ ޓިކެޓުގައި މަނިކުފާނުގެ ނަން ނުބޭއްވީ އެމް.ޑީޕީން ކަމަށެވެ. އަދި އެއީ އެމް.ޑީ.ޕީގެ ކެނޑިޑޭޓު ރައީސް ނަޝީދުގެ ކެންޑިޑެސީ ރައީސް ޔާމީން އިސްވެހުރެ 2018 ގައި ދުއްވާލުމުގެ ބަދަލުގައި ކަމަށް ވިދާޅުވެ ފައިސަލްވަނީ އެކަމުގައި ޕީޕީއެމްގެ ލީޑަރޝިޕްގެ ދައުރެއް ނެތްކަމަށް ވިދާޅުވެފައެވެ.

ހަމައެއާއެކު ރިޔާސީ އިންތިޚާބު ބޮއިކޮޓްކޮށް އިދިކޮޅު ފަރާތްތައް އިތުރު ފަސް އަހަރު މަގުމަތީގައި ބޭއްވުމަށް ރައީސް ޔާމީން ނިންމެވި ހިސާބުން އެމަނިކުފާނުގެ ލީޑަރޝިޕް ފެއިލްވެއްޖެ ކަމަށްވެސް ފައިސަލް ވިދާޅުވިއެވެ.

“ޕާޓީ އަކީ މަނިކުފާނުގެ ތަރިކަ މުދަލެއްކަމަށް ހިތާ ޕާޓީއަށް ލިބުނު ފައިސާގެ އެކި މިންވަރުގެ އެހީން ބޮޑު ބައެއް 2013 އިން ފެށިގެން އަމިއްލަފުޅު އެކައުންޓްތަކަށް ލައްވަމުން ދިޔައީ ޕީޕީއެމް ޢާންމު މެމްބަރުންނަކީ މޮޔައިން ކަމަށް މަނިކުފާނު ދެކޭތީތޯއެވެ. އަޅުގަނޑުގެ ބައްޕަ އާއި މިއަދުގެ ޤައުމުގެ ރައީސް ޑރ. މުޢިއްޒުގެ ހިތްވަރާއި ކެރުން ނެތްނަމަ، އަދިވެސް އަޅުގަނޑުމެން ތިބެން ޖެހޭނީ މަގުމަތީގައެވެ. މި ޤައުމު އޮންނާނީ އޮޔާގޮސް ލޯމަތިން ގެއްލިފައެވެ.” ފައިސަލްގެ ބަޔާން ނިންމަވާ ލައްވަމުން ވިދާޅުވެފައިވެއެވެ.