ބަންގްލަދޭޝްގެ ސަރުކާރުން އެގައުމުގެ ޑިޕްލޮމެޓިކް ރަތް ޕާސްޕޯޓް ބާތިލްކުރަން ނިންމައިފިއެވެ.

ދާދިފަހުން ހިނގި ހަމަނުޖެހުމެއްގައި ވެރިކަން ވެއްޓުމާ ގުޅިގެން މިހާރު ބަންގްލަދޭޝްގައި އޮތީ ވަގުތީ ސަރުކާރެކެވެ. އެ ސަރުކާރުން ނިންމާފައި ވަނީ އެގައުމުގެ ކުރީގެ ވަޒީރުންނާއި ރައްޔިތުންގެ މަޖިލީހުގެ މެންބަރުންނަށް ދޫކުރެވިފައިވާ ޕާސްޕޯޓުތައް ބާތިލު ކުރުމަށެވެ.

ބަންގްލަދޭޝްގެ ހޯމް މިނިސްޓްރީގެ ސެކިއުރިޓީ ސަރވިސް ޑިވިޜަންގެ ސީނިއަރ ސެކްރެޓަރީ މުޙައްމަދު މަޝިއުރު ރަޙްމާން ބޭރުގެ މީޑިޔާއަކަށް ދެއްވި އިންޓަވިއުއެއްގައި ވަނީ މިކަމާ ގުޅޭގޮތުން އަޅަންޖެހޭ ފިޔަވަޅުތައް އެޅުމުގެ މަސައްކަތް ފަށާފައިވާ ކަމަށް ވިދާޅުވެފައެވެ.

ސެކްރެޓަރީ ވިދާޅުވީ، ބަންގްލަދޭޝްގެ އިމިގްރޭޝަން އެންޑް ޕާސްޕޯޓް ޑިޕާޓްމަންޓަށް މިކަމާ ގުޅޭ އިރުޝާދު ދީފައިވާ ކަމަށެވެ. އަދި އެ އިދާރާއިން އޭގެ މަސައްކަތްތައް މިހާރު ފަށައި، ވަރަށް އަވަހަށް މިކަމާއި ގުޅޭ އަމުރު ނެރެވޭނެ ކަމަށެވެ.

އެގައުމުގެ ރައްޔިތުންގެ މަޖިލީހުގެ މެންބަރުންގެ އިތުރުން އެބޭފުޅުންގެ އާއިލާ މެންބަރުންވެސް ޑިޕްލޮމެޓިކް ޕާސްޕޯޓް ގެންގުޅޭއިރު، އެކަމާއި ގުޅޭގޮތުން ސެކްރެޓަރީ ވިދާޅުވީ، މަޖިލިސް މެމްބަރުންގެ ޑިޕްލޮމެޓިކް ޕާސްޕޯޓު ކެންސަލްކުރާއިރު، އޮޓޮމެޓިކުން އެމީހުންގެ ޢާއިލާގެ މެންބަރުންގެ ޕާސްޕޯޓުތައްވެސް ކެންސަލްވާނެކަމަށެވެ.

މި މައްސަލައާ ބެހޭގޮތުން ވާހަކަ ދައްކަވަމުން ސެކްރެޓަރީ ވިދާޅުވީ ޑިޕްލޮމެޓިކް ޕާސްޕޯޓު ލިބިފައިވާ މީހަކު އައު ޕާސްޕޯޓެއް ހޯދަން ބޭނުންވާނަމަ، އެމީހަކު ޑިޕްލޮމެޓިކް ނުވަތަ ރަތް ޕާސްޕޯޓު ދޫކޮށްލުމަށްފަހު ޤާނޫނާ އެއްގޮތަށް އާންމު ޕާސްޕޯޓެއް ދޫކުރެވޭނެކަމަށެވެ.

ބަންގްލަދޭޝްގެ ވަގުތީ ސަރުކާރުން މިފަދައިން ނިންމާފައިވާއިރު، އެގައުމުގައި އެންމެ ފަހުން ބޮޑުވަޒީރުކަން ކުރެއްވި ޝައިޚް ހަސީނާގެ އަތްޕުޅުގައި އޮންނަނީ ވެސް ޑިޕްލޮމެޓިކް ޕާސްޕޯޓެކެވެ.

ޝައިޚް ހަސީނާ ވަނީ މިމަހުގެ 5 ވަނަ ދުވަހު މަގާމުން އިސްތިއުފާ ދެއްވުމަށް ފަހު، ބަންގްލަދޭޝް ދޫކުރައްވައި އިންޑިއާގެ ހިމާޔަތް ހޯއްދަވާފައެވެ.