ސިޔާސީ ނުތަނަވަސްކަމުގެ ތެރެއަށް އެމަނިކުފާނުގެ ދަރިން ނުވެއްދުމަށް އިޤްތިޞާދީ ވަޒީރު މުޙައްމަދު ސަޢީދު އެދިވަޑައިގެންފިއެވެ.

ވަޒީރު ސައީދު މިއަދު ވިދާޅުވީ ސިޔާސީގޮތުން އެމަނިކުފާނަށް ފާޑުކިޔުމަކީ މައްސަލައެއްނޫން ކަމަށާއި ނަމަވެސް ދޮގު ޚަބަރު ފަތުރައި އެމަނިކުފާނުގެ ތުއްތު ދަރިފުޅުގެ މުޅި ތައުލީމީ ހަޔާތް ނުތަނަވަސްކަމުގެ ތެރެއަށް ވައްޓާލުން ބަލައި ނުގަނެވޭނެ ކަމަށެވެ.

“ހަސަންކުރުސީގެ ނަމުގައި ފިލާތިބެ ބަޔަކު ޒާތީވެ، އަޅުގަނޑުގެ 4 އަހަރުގެ ތުއްތުދަރިފުޅުގެ މުޅި ތަޢުލީމީ ޙަޔާތް ނުތަނަވަސްކަމުގެ ތެރެއަށް ވައްޓާލައި ދޮގުޚަބަރުތައް ފެތުރުމަކީ ނާތަހުޒީބު ޢަމަލެއް.” ވަޒީރު ސަޢީދު ވިދާޅުވެފައިވެއެވެ.

ސިޔާސީގޮތުން އަޅުގަނޑާއިމެދު ފާޑުކިޔުމަކީ މައްސަލައެއްނޫން. ހަސަންކުރުސީގެ ނަމުގައި ފިލާތިބެ ބަޔަކު ޒާތީވެ،އަޅުގަނޑުގެ 4އަހަރުގެ ތުއްތުދަރިފުޅުގެ މުޅިތަޢުލީމީޙަޔާތް ނުތަނަވަސްކަމުގެ ތެރެއަށްވައްޓާލައި ދޮގުޚަބަރުތައް ފެތުރުމަކީ ނާތަހުޒީބު ޢަމަލެއް.

— Mohamed Saeed (@em_saeed) August 23, 2024

މީސްމީޑިއާގައި ވަޒީރު ސަޢީދު މިގޮތަށް އެދިވަޑައިގެންފައިވާއިރު ޙަސަން ކުރުސީގެ ނަމުގައި މީސްމީޑިއާގައި ހިންގާ އެކައުންޓުން ވަނީ އަޖިއަލް އިންޓަނޭޝަނަލް ސްކޫލުގައި ކިޔަވަމުންދާ ވަޒީރު ސައީދުގެ ދަރިފުޅާމެދު އަމަލުކުރި ގޮތަކާމެދު ހިތްހަމަނުޖެހިގެން އެ ސްކޫލުގައި މަސައްކަތްކުރާ އިނގިރޭސިވިލާތުގެ ޓީޗަރެއް ޑީޕޯޓްކުރަން ވަޒީރު ސަޢީދު މަސައްކަތްކުރަށްވާ ކަމަށް ތުހުމަތު ކޮށްފައެވެ.