ވ ތިނަދޫން ދެ މީހަކު ކޯވިޑް-19އަށް ޕޮޒިޓިވްވެއްޖެއެވެ.

ހެލްތު އެމާޖެންސީ އޮޕަރޭޝަން ސެންޓަރުން ވިދާޅުވީ، މިއަދު ކޯވިޑް-19އަށް ވ ތިނަދޫން ޕޮޒިޓިވްވެފައި ވަނީ ދެ ދިވެހިންކަމަށެވެ. މިގޮތުން އެރަށުން ޕޮޒިޓިވްވެފައި ވަނީ އުމުރުން، 36 އަހަރުގެ އަންހެނަކާއި ފިރިހެނެއް ކަމުގައި އެޗްއީއޯސީން ވިދާޅުވެފައި ވެއެވެ.

ވ ތިނަދޫއިން ޕޮޒިޓިވްވި ދެމީހުންނަކީ، ފުރަބަންދުގެ ކަރަންޓީނުގެ މުއްދަތު ހަމަވެގެން ކަރަންޓީނުން ދޫކޮށްލުމަށް ޓެސްޓު ކުރި ދެމީހުންނެވެ. ހެލްތު ޕްރޮޓެކްޝަން އޭޖެންސީ އެޗްޕީއޭއިން ހާމަކުރައްވާފައިވާ ގޮތުގައި، ރާއްޖޭގެ އަތޮޅުތަކުގެ 18 ރަށެއްގަޔާއި، 13 ރިޒޯޓެއްގައި ކޯވިޑް-19އަށް ޕޮޒިޓިވްވެފައިވާ މީހުން އެބަތިއްބެވެ.

ރާއްޖޭގައި ކޯވިޑް-19 ޖެހުނު މީހުންގެ ޖުމްލަ ޢަދަދު 6079 އަށް އަރާފައިވާއިރު، ބަލިން ރަނގަޅުވި މީހުންގެ ޖުމްލަ ޢަދަދު މިހާރު ވަނީ 3648 އަށް އަރާފައެވެ. މި ބައްޔަށް ފަރުވާ ހޯދަމުންދަނީ 2407 މީހުންނެވެ. މީގެތެރެއިން 144 މީހަކަށް ހޮސްޕިޓަލުގައި އަންނަނީ ފަރުވާ ދެމުންނެވެ.