ވެރިކަމުގެ ފަސް އަހަރުގެ ތެރޭގައި ރާއްޖެއަށް ކުރިމަތިވެފައިވާ ބިދޭސީންގެ މައްސަލަ ހައްލުކޮށްދެއްވާނެ ކަމަށް އަންނަ ރިޔާސީ އިންތިޚާބުގައި ވާދަކުރައްވާނެ ކަން އިއުލާން ކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.

އުމަރު ނަސީރު ފޭސްބުކްގައި އާންމުކުރެއްވި ވީޑިއޯ މެެސެޖެއްގައި ވިދާޅުވީ ވެރިކަމުގެ ފަސް އަހަރުގެ ތެރޭގައި ރާއްޖެއަށް ކުރިމަތިވެފައިވާ ބިދޭސީންގެ މައްސަލަ ހައްލުކޮށްދެއްވާނެ ކަމަށާއި އެގޮތުން އޭނާގެ ވެރިކަމެއްގައި އެއް ލައްކަ ބިދޭސީން އަނބުރާ ގައުމަށް ފޮނުވާލާނެ ކަމަށެވެ.

"އޭގެތެރޭގައި ގަވާއިދާ ޚިލާފަށް އުޅޭ މީހުންނާއި ދިވެހިންގެ ނަމުގައި ބިދޭސީން ހިންގާ ވަގު ވިޔަފާރިތަކާއި، އަދި ކޮންޓްރެކްޓް ނަގައިގެން މަސައްމަތް ކުރާ ބިދޭސީންހިމެނޭނެ." އުމަރު ވިދާޅުވިއެވެ.

މީގެ އިތުރުން ބިދޭސީންގެ ބަދަލުގައި ދިވެހިންނަށް އިސްކަންދޭ ކުންފުނި ތަކުގެ ޓެކްސްވެސް ލުއިކޮށް ދެއްވާނެ ކަމަށް އުމަރު ވިދާޅުވިއެވެ.

"އިރާދަކުރެއްވިއްޔާ ބިދޭސީންގެ މައްސަލަ އަޅުގަނޑުގެ ފަސް އަހަރުތެރޭގައި ހައްލުކޮށްދޭނަން." އުމަރު ވިދާޅުވިއެވެ.

އުމަރު ނަސީރު ވަނީ 2008 ގެ ރިޔާސީ އިންތިހާބުގައި ވެސް ވާދަކުރައްވާފައެވެ. ނަމަވެސް އެފަހަރު އުމަރަށް ލިބިވަޑައިގެންނެވީ ވަރަށް މަދު ވޯޓުކޮޅެކެވެ. އަދި 2013 ގެ ރިޔާސީ އިންތިހާބުގެ ޓިކެޓް ހޯއްދެވުމަށް ޕީޕީއެމްގެ ޕްރައިމަރީގައި އޭނާ ވާދަކުރެއްވި އެވެ. އެކަމަކު، އެ އިންތިޚާބުގައި ކުރި ހޯއްދެވީ ރައީސް އަބްދުﷲ ޔާމީނެވެ.

އުމަރު ވަނީ އޭނާގެ ވެރިކަމެއްގައި ރައްޔިތުންނަށް ކަންކަން ކޮށްދެއްވާނެ ގޮތުގެ ސިޔާސަތުތަކެއް ހުށަހަޅުއްވައިފަ އެވެ. އޭގެ ތެރޭގައި މީހުން މެރުން ހުއްޓުވުމާއި މަސްތުވާތަކެތީގެ ވަބާގެ އިތުރުން ކޮރަޕްޝަން ހުއްޓުވައި ގައުމު އަމާންކުރުން ހިމެނެ އެވެ.