ޅ.ހިންނަވަރާއި، ތ.ތިމަރަފުށީގައި ފުރަބަންދު ކަރަންޓީނުގައި ތިބި ބަޔަކު ކޯވިޑް-19 އަށް ޕޮޒިޓިވްވެއްޖެއެވެ.

ހެލްތް އިމަރޖެންސީ އޮޕަރޭޝަން ސެންޓަރުން ބުނީ ހިންނަވަރުގައި ފުރަބަންދު ކަރަންޓީންގައި ތިބި 78 އަހަރުގެ އަންހެނަކާއި 10 އަހަރުގެ އަންހެން ކުއްޖެއްގެ ރިލީޒް ސާމްޕަލްނަގައި ޓެސްޓުކުރި އިރު އެމީހުން ޕޮޒިޓިވްވަފައިވާކަމަށެވެ. އަދި ތިމަރަފުށީގައި ފުރަބަންދު ކަރަންޓީން ފުރިހަމަކުރި 38 އަހަރުގެ ފިރިހެނަކުވެސް ޕޮޒިޓިވްވެފައިވާކަމަށް އެޗްއީއޯސީން ބުނެފައި ވެއެވެ.

މާލޭގެ އިތުރުން އައްޑޫ ސީޓީއާ ފުވައްމުލަކު ސިޓީ ގެ ބައެއް ރަށްރަށް ހިމެނޭހެން މިވަގުތު 20 ރަށެއްގައި ކޯވިޑް-19އަށް ޕޮޒިޓިވް މީހުން ތިބިކަމަށް އެޗްޕީއޭއިން ރޭ ހާމަކޮށްފައިވާއިރު މިއަދު ޕޮޒިޓިވް ކޭސްތައް ފެނުނުކަން ހާމަކުރި 2 ރަށާއެކު 22 ރަށެއްގައި މިވަގުތު ކޯވިޑް-19އަށް ޕޮޒިޓިވް މީހުން އެބަތިއްބެވެ.

ރަށްރަށުގެ އިތުރުން ރާއްޖޭގެ 12 ރިސޯޓަކުން 7 ފަތުރުވެރިއަކާއި 13 މުވައްޒަފަކު ޕޮޒިޓިވްވެފައިވާކަމަށްވެސް އެޗްޕީއޭއިން މައުލޫމާތު ދެއެވެ.

މާލެއިން ރަށްރަށަށް ދިއުމުގައި މިހާރު އޮތް އުސޫލުން ކޮންމެ މީހަކު ވެސް ރަށަށް ގޮސް ކައުންސިލްގެ ބެލުމުގެ ދަށުން އެ މީހަކު ދިރިއުޅޭ ގޭގައި ނުވަތަ ކަރަންޓީން އުސޫލާ އެއްގޮތަށް ހުރެވޭނެ އެހެން ތަނެއްގައި 14 ދުވަހު ކަރަންޓީން ވާންޖެހެ އެވެ.