އިލެކްޝަންސް ކޮމިޝަންގެ ރައީސް ކަމުގެ މަގާމުގައި ހުންނެވި ފުއާދު ތައުފީގުގެ މަގާމުގެ ދައުރު ހަމަވާތީ އޭނާ ހުންނެވި މެންބަރުކަމުގެ މަގާމަށް ކުރިމަތި ލުމުގެ ފުރުސަތު ހުޅުވާލައިފިއެވެ.

ރައީސް އޮފީހުން މިއަދު ބުނީ، އިލެކްޝަންސް ކޮމިޝަންގެ މެންބަރުކަމަށް އެދި ހުށަހެޅުމުގެ ފުރުސަތު މިއަދުން ފެށިގެން 23 ސެޕްޓެންބަރު 2024 ވާ ހޯމަ ދުވަހުގެ 12:00 ގެ ނިޔަލަށް ހުޅުވާލާފައިވާ ކަމަށެވެ.

އަދި ކޮމިޝަނުގެ މެންބަރުކަމަށް ކުރިމަތިލުމަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ، މިކަމަށް ކުރިމަތިލުމަށް ދީފައިވާ މުއްދަތުގައި، ރަސްމީ ބަންދުދުވަސްތައް ފިޔަވައި، އެހެން ދުވަސްދުވަހުގެ ހެނދުނު 08:30 އިން މެންދުރު 12:00 އަށް ރައީސުލްޖުމްހޫރިއްޔާގެ އޮފީހުން ކަމަށް ވަނީ ބުނެފައެވެ.

އެ ކަމަށްއެދޭ ފޯމް ރައީސް އޮފީހުން ލިބެން ހުންނާނެކަމަށް ވެސް އެ އޮފީހުން ވަނީ ބުނެފައެވެ.

ހުސްވާ ފުއާދުގެ މަގާމަށް ހުށަހަޅަން އިއުލާނު ކޮށްފައިވާއިރު ފުއާދު އެ މަގާމަށް އައްޔަނު ކޮށްފައިވަނީ 2021 ވަނަ އަހަރުގެ ސެޕްޓެމްބަރ މަހުގެ 15 ގައެވެ.

ފުއާދު ވަނީ މީގެ ކުރިންވެސް އެ ކޮމިޝަނުގެ ރައީސްގެ މަގާމު އަދާކުރައްވާފައެވެ. އަދި 2008 ވަނަ އަހަރުން ފެށިގެން 2009 ވަނަ އަހަރާ ހަމައަށް އީސީގެ މެންބަރުކަންވެސް ފުރުއްވާފައި ވެއެވެ.