އިލެކްޝަންސް ކޮމިޝަނުގެ ރައީސްކަމުގައި އޭނާ ހުންނެވި މުއްދަތުގެ ތެރޭގައި އެއްވެސް ޕާޓީއަކަށް ނުޤަވާއިދުން މީހަކު ވައްދާފައި ނުވާނެ ކަމަށް އީސީގެ ކުރީގެ ރައީސް ފުއާދު ތައުފީގު ވިދާޅުވެއްޖެއެވެ.

ފުއާދު މިހެން ވިދާޅުވީ ވެރިންކުރާ ޕީއެންސީއަށް މިދިޔަ އަހަރުގެ ސެޕްޓެމްބަރުން ފެށިގެން ޑިސެމްބަރު މަހުގެ ނިޔަލަށް 39 ހާސް މެންބަރުން ވައްދާފައިވަނީ ފުއާދުގެ ބައިވެރިވުންވެސް އޮވެގެން ކަމަށް ބައެއް ފަރާތްތަކުން ކުރަމުންދާ ތުހުމަތުތަކަށް ރައްދު ދެއްވަމުންނެވެ.

އެގޮތުން ފުއާދު ވިދާޅުވެފައިވަނީ އޭނާ އީސީގެ ރައީސްކަމުން 2024 ނޮވެމްބަރ 23 ވަނަ ދުވަހު ވަކިވުމާ ހަމައަށް ނުޤަވާއިދުން ކަމެއް ކޮށްފައި ނުވާނެކަމުގެ ޔަޤީންކަން ރައްޔިތުންނަށް އަރުވާ ކަމަށެވެ.

އޭގެއިތުރުން ރަނގަޅަށް ހިސާބުތައް ބެލުމަށްފަހު ސަލާމަތް ބުއްދި ޤަބޫލުކުރާ ވާހަކަ ދެެއްކުމަށްވެސް ފުއާދު އިލްތިމާސް ކުރަށްވާފައިވެއެވެ.

“ހުޅަނގު ފަރާތުން އިރުއަރައިފިޔޭ މީހަކު ބުނާއިރަށް ޤަބޫލު ކުރާކަށް ނުވާނެ.” ފުއާދު ވިދާޅުވެފައިވެއެވެ.

ފުއާދު މިހެން ވިދާޅުވެފައިވާއިރު އީސީގެ ދަފްތަރު ދައްކާގޮތުން މިދިޔަ އަހަރުގެ ޑިސެމްބަރުމަހުގެ ނިޔަލަށް ވެރިކަން ކުރާ ޕީއެންސީގެ މެންބަރުންގެ ޢަދަދު 68968 އަށް ވަނީ އިތުރުވެފައެވެ. ނަމަވެސް އެހެން ސިޔާސީ ޕާޓީތަކުގެ މެންބަރުންގެ ޢަދަދު ވަނީ ބޮޑުތަނުން މަދުވެފައެވެ. އެގޮތުން އިދިކޮޅު އެމްޑީޕީން އެކަނިވެސް 7 ހާހެއްހާ މެންބަރުން މަދުވެފައިވެއެވެ.

އީސީގައި ދެ ދައުރު ފުރިހަމަ ކުރެއްވުމަށްފަހު ފުއާދު މިހާރު ހުންނެވީ ރާއްޖޭން ތައިލެންޑަށް ކަނޑައަޅުއްވާފައިވާ ސަފީރުކަމުގެ މަޤާމުގައެވެ.