ދަރުމަވަންތަ ހޮސްޕިޓަލުގެ 18 ވަނަ ފަންގިފިލާގައި ފަރުވާ ދެމުންދާ 2 ޕޭޝެންޓުންނާއި ހޮސްޕިޓަލުގެ ސީއީއޯއާ އެއްވެސް އާއިލީ ގުޅުމެއް ނެތް ކަމަށް ބުނެ އައިޖީއެމްއެޗުން ދިފާޢީ ބަޔާނެއް ނެރެފިއެވެ.

ފަހަކަށް އައިސް މީޑިއާ ތަކުން ތިލަކުރާ އެކިއެކި މައްސަލަތަކާ ގުޅިގެން އައިޖީއެމްއެޗުން ދިފާޢީ ބަޔާންތައް ނެރުން ވަނީ އިތުރުވެފައެވެ. ރާއްޖޭގެ މީޑިއާ އަކުން ރޭގެ ވަގުތެއްގައި ވަނީ އައިޖީއެމްއެޗްގެ 18 ވަނަ ފަންގިފިލާގައި ފަރުވާ ހޯދަމުންދާ 2 ޕޭޝަންޓުންނަކީ އެ ހޮސްޕިޓަލުގެ ސީ.އީ.އޯ އިބްރާހީމް ސަލީމްގެ އާއިލީ ބޭފުޅުން ކަމަށް ބުނެ ރިޕޯޓް ކޮށްފައެވެ.

އެކަމާ ގުޅިގެން އައިޖީއެމްއެޗުން މިއަދު ނެރެފައިވާ ނޫސް ބަޔާނެއްގައި ވަނީ އެ ހޮސްޕިޓަލުގައި އެކި ބަލިބައްޔަށް ފަރުވާ ދެމުންދާ ޕޭޝަންޓުގެ ތެރެއިން 2 ބަލިމީހަކު 1 މެއި 2020 ގައި، ކޯވިޑް-19 ގެ އޭރުގެ ހާލަތާއި ގުޅިގެން ޓްރީޓޮޕް ހޮސްޕިޓަލަކީ ކޯވިޑް-19 އަށް ޚާއްޞަ ހޮސްޕިޓަލުގެ ގޮތުގައި ހަމަޖެހުމާއި ގުޅިގެން އެ ހޮސްޕިޓަލަށް ބަދަލުކޮށްފައިވާ ކަމަށެވެ.

އަދި މި ދެ ޕޭޝަންޓުންނަކީ ހޮސްޕިޓަލުގައި ކަނޑައެޅިފައިވާ ނިޒާމުގެ ތެރެއިން ރަޖިސްޓަރީކޮށް، އެނދުމަތިކޮށް، އުޞޫލުތަކާއި އެއްގޮތަށް ފަރުވާ ދެމުންދާ ޕޭޝަންޓުން ކަމުގައިވެސް އެ ހޮސްޕިޓަލުން ވަނީ ބުނެފައެވެ.

މީގެ އިތުރުން މި ޕޭޝަންޓުންނަކީ އާސަންދައިން ކަވަރ ނުކުރާ ޕްރައިވެޓް ރޫމް ޗާޖް ފަދަ ޚަރަދުތައްވެސް، ކަނޑައެޅިފައިވާ ޤަވާއިދާއި އެއްގޮތަށް ބަރާބަރަށް ދައްކަމުން އަންނަ ފަރާތްތަކެއްކަމަށާއި، މި ޕޭޝަންޓުންނަކީ އެ ހޮސްޕިޓަލުގެ ސީ.އީ.އޯ އިބްރާހީމް ސަލީމްއާއި އާއިލީ އެއްވެސް ގުޅުމެއް ނެތް ދެ ޕޭޝަންޓުން ކަމުގައިވެސް އެ ހޮސްޕިޓަލުން ވަނީ ބުނެފައެވެ.

މި ބަޔާނުގައި އިތުރަށް ބުނެފައިވަނީ އިސްވެރިންނާއި ޑޮކްޓަރުން އަދި ޕޭޝަންޓުންވެސް ބަދުނާމުވާގޮތަށް ކަމުގެ ޙަޤީޤަތް އެއްވެސް މިންވަރަކަށް ސާފުކުރުމެއް ނެތި، އަދި ކޯވިޑް-19 ގެ ބަލިމަޑުކަމާއި ގުޅިގެން އެންމެހައި ރައްޔިތުންގެ ހިތުގައި އިންތިހާއަށް ނުތަނަވަސްކަން އުފެދިފައިވާ މި ދަނޑިވަޅުގައި، މިފަދަ ދޮގު ވާހަކަތައް ފެތުރުން އެންމެ ހަރުކަށި އިބާރާތުން ކުށްވެރިކުރާކަމަށެވެ. އަދި ޒިންމާދާރުކަމާއެކު މަޢުލޫމާތު ފެތުރުމަށް އެ ހޮސްޕިޓަލުން ވަނީ އިލްތިމާސް ކޮށްފައެވެ.