މާދަމާ ރެެއިން ފެށިގެން ރޭގަނޑު 8:00 އިން ފަތިހު 5:00 އަށް މާލެ ސަރަހަައްދުގައި އެއްގަމު އުޅަނދު ދުއްވުން މަނާކުރަން ސަރުކާރުން ނިއްމައިފިއެވެ.

މާދަމާ ރެއިން ފެށިގެން ރޭގަނޑު 8:00 އިން ފެށިގެން ފަތިހު 05:00 އާއި ދެމެދު މާލެ އާއި ހުޅުމާލެ އަދި ވިލިމާލޭގައި އެއްގަމު އުޅަނދު ދުއްވުން މަނާކުރަން ނިއްމި ކަން ސަރުކާރުން އިއުލާންކުރީ އެޗްއީއޯސީ އިން މިރޭ ބޭއްވި ނޫސްވެރިންގެ ބައްދަލުވުމެއްގައެވެ.

އެޗްއީއޯސީގެ ނޫސްވެރިންގެ ބައްދަލުވުމެއްގައި ފުލުހުންގެ ޗީފް ސްޕްރިންޓެންޑެންޓް އޮފް ޕޮލިސް އަބްދުﷲ ޝަރީފް ވިދާޅުވީ މިނިންމުން ތަންފީޒު ކުރުމުގެ މަސައްކަތް މާދަމާ ރެއިން ފެށިގެން ފުލުހުން ކުރާނެ ކަމަށެވެ. ޝަރީފް ވިދާޅުވީ މާލެ، ވިލިމާލެ އަދި ހުޅުމާލޭގައި އެވަގުތުތަކުގައި އެއްގަމު އުޅަނދު ދުއްވުން މަނާވާނެ ކަމަށެވެ. އެވަގުތުތަކުގައި ގަވާއިދާ ހިލާފަށް އެއްގަމު އުޅަނދު ދުއްވާނަމަ ޖޫރިމަނާ ކުރާނެ ކަމަށް ވެސް އޭނާ ވިދާޅުވިއެވެ.

"ކުށް ތަކުރާރު ކުރާ ނަމަ ވެހިކަލް ޓޯކުރާނެ، އެ ވެހިކަލެއް ދޫކުރާނީ ކަނޑައެޅިފައިވާ ޖޫރިމަނާ ދެއްކުމުން." ޝަރީފް ވިދާޅުވިއެވެ.

ޝަރީފް ވިދާޅުވީ ވެހިކަލް ޖޫރިމަނާ ކުރާނީ 1000 ރުފިޔާއިން ކަމަށެވެ.

ރޭގަނޑު އަށަކުން ފެށިގެން ވެހިކަލް ދުއްވުން މަނާކުރި ނަމަވެސް ދިހައެއް ޖެހުމާއި ހަމައަށް މަގުމަތީގައި އުޅެވޭނެ ކަމަށްވެސް ޝަރީފް ވިދާޅުވިއެވެ. ނަމަވެސް އަށަކުން ދިހައަކަށްވެސް ވެހިކަލް ދުއްވާތޯ ބެލުމަށް ފުލުހުން ހަރަކާތެރިވާނެ ކަމަށް އޭނާ ވިދާޅުވިއެވެ.

"އަޅުގަނޑު މީގައި ފާހަގަކޮށްލަން ބޭނުން އެ ވެހިކަލެއް ދުއްވަނީ ވެހިކަލްގެ ވެރި ފަރާތް ނޫން ނަމަވެސް އެ ވެހިކަލް ޖޫރިމަނާ ކުރާނަން. އެހެންވީމަ ވެހިކަލްތަކުގެ ވެރިން އެކަމަށް ހާއްސަ ސަމާލުކަމެއް ދޭން ޖެހޭނެ." ޝަރީފް ވިދާޅުވިއެވެ

މާދަމާ ރެއިން ފެށިގެން ފިހާރަތަކުގައި މަސައްކަތް ކުރާ މީހުން ވެސް 20:00 ގައި ފިހާރަ ބަންދު ކުރުމަށްފަހު ދާން ބޭނުންވާ ތަނަކަށް ދާން ޖެހޭނީ ހިނގާފައި ކަމަށް ޝަރީފް ވިދާޅުވިއެވެ.

ޝަރީފް ވަނީ ހުރިހާ ވިޔަފާރިވެރިންވެސް 9:30 ގައި ފިހާރަތައް ބަންދު ކުރުމަށް އިލްތިމާސްކުރައްވާފައެވެ. ހަމަޖެހިފައިވާ ވަގުތަށް ފިހާރަތައް ބަންދުކުރޭތޯވެސް ފުލުހުން ބަލާނެ ކަމަށާއި، ރޭގަނޑު 9:30 ގެ ފަހުންވެސް އޮންލައިންކޮށް ބައެއް މީހުން ވިޔަފާރި ކުރާ ކަމުގެ ޝަކުވާ ލިބޭ ކަމަށާ އެކަން އެގޮތަށް ނުކުރުމަށްވެސް ޝަރީފް އިލްތިމާސްކުރެއްވިއެވެ.

އަދި ރޭގަނޑު 10:00 ޖެހުމުގެ ކުރިން ފިހާރަތަކުގެ ސްޓާފުންނަށް ގެއަށް ދެވޭނެ ގޮތަށް އިންތިޒާމްތައް ހަމަޖެއްސުމަށްވެސް ފުލުހުން ވަނީ އަންގާފައެވެ.