ހުޅުމާލެ ފަރަށް މި އަހަރުގެ ކުރީކޮޅު އެރި ޓަގާއި ބާޖުގެ ވެރިފަރާތް 29 މިލިއަން ރުފިޔާއިން ޖޫރިމަނާ ކޮށްފައިވާ ކަމަށް އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން ބުނެފިއެވެ.

އީޕީއޭ އިން ބުނީ މިހާދިސާގައި ފަރަށް ލިބުނު ގެއްލުންތައް ބެލުމުގެ ގޮތުން މި އުޅަނދުތަކުގެ ވެރިފަރާތުން އައްޔަންކޮށްފައިވާ ސަރވެޔަރުންނާއެކު ޖޮއިންޓް ސަރވޭއެއް ކުރިޔަށް ގެންދެވިފައިވާ ކަމަށެވެ.

އުޅަނދުތައް ފަރަށް އުރުމުގެ ސަބަބުން އެ ސަރަޙައްދަށް ލިބިފައިވާ ގެއްލުން ދެނެގަތުމަށްޓަކައި ކުރިޔަށް ގެންދެވުނު ސަރވޭއިން ދައްކާގޮތުގައި އެ ސަރަހައްދުގެ 1159 އަކަ މީޓަރަށް ބޮޑެތި ގެއްލުންތަކެއްވެފައިވާ ކަަމަށް އީޕީއޭއިން ބުނެފައި ވެއެވެ.

އެއާއެކު ހުޅުމާލޭގެ އުތުރުފަރާތު ފަރުގެ މާހައުލަށް ލިބުނު ގެއްލުންތަކަށް ކަނޑައެޅުނު ޖޫރިމަނާގެ ޢަދަދަކީ 29,201,946ރ. ކަމަށް އީޕީއޭއިން ވަނީ ބުނެފައެވެ.

އީޕީއޭ އިން ބުނީ މި ހާދިސާގައި ފަރަށް ލިބުނު ގެއްލުމުގެ ބަދަލުގައި ދައްކަން ޖެހޭ ޖޫރިމަނާގެ ފައިސާ އެ އެޖެންސީއަށް 30 ދުވަހުގެ ތެރޭގައި ދެއްކުމަށް އެ އުޅަނދުތަކުގެ އޮޕަރޭޓަރ ކަމުގައިވާ ދި މިޑްލް އީސްޓް މެރިން އެލްއެލްސީއަށް މި މަހުގެ އެއް ވަނަ ދުވަހު އަންގާފައިވާ ކަމަށެވެ.

ޓަގު "އަނަޑީ" އަދި ބާޖު "އޭއެމް މަނުމިޓް" ހުޅުމާލޭގެ އުތުރުފަރާތު ފަރަށް އެެރީ މި އަހަރުގެ ފެބްރުއަރީ 21 ވަނަ ދުވަހެވެ. އަދި މި އުޅަނދުތައް ފަރުމަތިން ނަގާފައިވަނީ އޭގެ ދެ މަސް ފަހުން، އޭޕްރީލް މަހުގެ 23 ގައެވެ.