ރައްޔިތުންނަށް ހެޔޮ އެދޭ ބަޔަކު މި ފަދަ ވަގުތެއްގައި މުޒާހަރާއަކަށް ނުނިކުންނާނެ ކަމަށްވިދާޅުވެ ހެރިޓޭޖް މިނިސްޓަރު ޔުމްނާ މައުމޫން އިދިކޮޅު ފަރާތްތަކަށް ފާޑުވިދާޅުވެއްޖެއެވެ.

މާލެ ސަރަހައްދު ފިޔަވައި ރާއްޖޭގެ މީހުން ދިރިއުޅޭ ހުރިހާ ރަށެއްގައި ސަރުކާރުގެ އަމަލުތަކާ ދެކޮޅަށް، އަންނަ ހުކުރު ދުވަހު މުޒާހަރާ ކުރަން ޕީޕީއެމާއި ޕީއެންސީ ކޯލިޝަނުން ނިންމުމާއި ގުޅިގެން އެކަމަށް ފާޑުވިދާޅުވެ ޔުމްނާ މައުމޫން ކުރެއްވި ޓްވީޓްގައި ވިދާޅުވީ މިވަގުތަކީ ހުރިހާ ރައްޔިތުން ގުޅިގެން މި ނުރައްކާތެރި ބަލި މަޑުކަމުން އަރައިގަތުމަށް މަސައްކަތް ކުރަންވީ ވަގުތުކަމަށެވެ. މިއީ ބައިބައިވުން ބޮޑުކޮށް ހަމަޖެހުން ނަގާލަންވީ ވަގުތު ނޫންކަމަށް ޔުމްނާ ވިދާޅުވިއެވެ.

އަންނަ ހުކުރު ދުވަހުގެ ހަވީރު، އިދިކޮޅުން މުޒާހަރާ ބޭއްވުމަށް ހަމަޖެހިފައިވަނީ "ރާއްޖެ ވިއްކާލުމާ ދެކޮޅަށެވެ." ޕީއެންސީ އާއި ޕީޕީއެމުން ތުހުމަތު ކުރާ ގޮތުގައި ސަރުކާރުން ދަނީ ރާއްޖެ ތަރައްގީ ކުރުމުގެ ނަމުގައި، ގައުމުގެ ހަރު މުދާ ވިއްކައިގެން ލޯނު ނަގަމުންނެވެ. އެހެންވެ، އެ ޕާޓީތަކުގެ މެމްބަރުންގެ އިތުރުން އެމްޑީޕީގެ މެމްބަރުން ވެސް މުޒާހަރާގައި ބައިވެރިވުމަށް ކޯލިޝަނުން އެދެ އެވެ.

ޕީއެންސީ ކޯލިޝަނުން މީގެ ދުވަސްކޮޅެއް ކުރިން ވެސް ވަނީ، ރައީސް ޔާމީން މިނިވަން ކުރުމަށް ގޮވާލައި މާލޭގައި ސިލްސިލާ މުޒާހަރާތަކެއް ބާއްވާފަ އެވެ. އެކަމަކު އޭރު އެ މުޒާހަރާތައް މެދުކަނޑާލީ، ކޮވިޑް-19 މާލެ ތެރޭގައި ވަރަށް ބޮޑަށް ފެތުރެމުން ދާތީ އެވެ

ސިއްހީ ބޭފުޅުންދަނީ ރާއްޖޭގައި ކޯވިޑްގެ ނުރައްކާ މިހާލަތުގައި އޮތް ގޮތާއިމެދު ކަންބޮޑުވުން ފާޅުކޮށް ރައްޔިތުންގެ އެއްބާރުލުމަށް އެދެމުންނެވެ. އަދި ރައްޔިތުން ވީހާވެސް ބޮޑަށް ގައިދުރުކަން އިސްކޮށް ރައްކާތެރިކަމުގެ ފިޔަވަޅު އެޅުމަށް އެބޭފުޅުންދަނީ އިލްތިމާސް ކުރަމުންނެވެ.