ބޭންކް އޮފް މޯލްޑިވްސް އަށް ދައްކަންޖެހޭ ލޯނެއް ނުދައްކައިގެން ރައްޔިތުންގެ މަޖިލީހުގެ ކުރީގެ ނައިބު ރައީސް އަދި އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކުގެ ހެވީ ލޯޑް ކުންފުނީގެ ތިން ރަށެއް ވިއްކާލަން ބޭންކުން އިޢުލާނު ކޮށްފިއެވެ.

އެގޮތުން ބޭންކުން ވިއްކައިލަން އިއުލާނުކޮށްފައިވަނީ ޓޫރިސްޓް ރިސޯޓުގެ ގޮތުގައި ހިންގާ ފަރެސް އައިލެންޑް، ކުޑަ ފަރެސް އައިލެންޑް އަދި ބޮޑު ހުރާ އައިލެންޑެވެ. މި ތިން ރަށް ވިއްކާލަން ބީއެމްއެލްއިން އިޢުލާނު ކޮށްފައިވަނީ ހެވީލޯޑް ކުންފުނިން ނަގާފައި އޮތް 11 މިލިއަން ޑޮލަރު ލޯނަކަށް ފައިސާ ނުދެއްކުމުންނެވެ.

އޭގެ ތެރެއިން ފަރެސް އާއި ކުޑަފަރެސްއަކީ ރަހާ ރިސޯޓް ހިންގަމުންދާ ދެ ރަށެވެ. އަދި ބޮޑުހުރާއަކީ ދަނޑުވެރި ކަމަށް ދޫކޮށްފައި އޮންނަ ރަށެކެވެ.

އެ ރަށްރަށުގެ ހެޑް ލީޒް ހަމަވަނީ 2064 ވަނަ އަހަރު އެވެ.

ބޭންކުން ވަނީ މިރަށްތައް ގަތުމަށް ޝައުގުވެރިވާ ފަރާތްތަކުން ދެ ގޮތަކަށް ބިޑް ހުށަހެޅުމަށް ފުރުސަތު ދީފައިވެއެވެ. އެގޮތުން ފުރަތަމަ ގޮތަކީ ފަރެސް އައިލެންޑާއި، ކުޑަ ފަރެސް އައިލެންޑާއި ބޮޑުހުރާ އައިލެންޑަށް އެންމެ ކުޑައަގަކަށް 23،262،000 ޑޮލަރު ބިޑް ކުރުމެވެ.

ދެވަނަ ގޮތަކީ ފަރެސް އައިލެންޑާއި ކުޑަ ފަރެސް އައިލެންޑް އެއްކޮށް ގަތުމަށް އެންމެ ކުޑަ އަގަކަށް 23,262,000 ޑޮލަރު ބިޑް ކުރުމާއި ބޮޑު ހުރާ އައިލެންޑް ވަކިން ގަތުމަށް 23،262،000 ޑޮލަރު ބިޑް ކުރުމެވެ.

ބޭންކުން ވަނީ މިރަށްތަކަށް ބިޑުކުރަން ޝައުގުވެރިވާ ފަރާތްތަކަށް އަންނަ މަހުގެ 28ވަނަ ދުވަހުގެ މެންދުރުފަހު 12ގެ ކުރިން ޕްރޮޕޯސަލް ހުށަހެޅުމުގެ ފުރުސަތު ހުޅުވާލާފައެވެ.

ހެވީލޯޑްގެ ތިން ރަށެއް ވިއްކައިލަން އިއުލާނުކުރިއިރު މީރާއަށް ޓެކްސް ނުދައްކާ ކުންފުނިތަކުގެ ލިސްޓުގައި ވެސް އެކުންފުނި އެބައޮތެވެ.