ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ ހުސްވެފައިވާ މެންބަރުކަމުގެ މަޤާމުތަކަށް ކުރިމަތިލެއްވި ބޭފުޅުންނާއިމެދު އާންމުންގެ ހިޔާލް ހުރިގޮތެއް ބެލުމަށް ރައްޔިތުންގެ މަޖިލީހުން މިއަދު ހުޅުވާލައިފިއެވެ.

ހިއުމަން ރައިޓްސް ކޮމިޝަނަށް ހުށަހަޅާފައިވާ ނަންތައް ދިރާސާކުރުމަށް ފޮނުވާފައިވަނީ ރައްޔިތުންގެ މަޖިލީހުގެ މިނިވަން މުއައްއަސާތަކާއި ބެހޭ ކޮމިޓީއަށެވެ. ކޮމިޝަނަށް ކުރިމަތި ލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާ އިސްކަންދެއްވި 8 ބޭފުޅުންނާއިއެކު ކުރިމަތި ލެއްވި ބޭފުޅުންގެ ނަންތައް ވަނީ މަޖިލީހަށް ފޮނުއްވާފައެވެ.

މަޖިލީހުން ވަނީ ކުރިމަތި ލެއްވި ހުރިހާ ބޭފުޅުންނަށް އާންމުންގެ ހިޔާލަށް ހުޅުވާލާފައެވެ. އާންމުންގެ ހިޔާލްތައް މިމަހުގެ 26 ގެ ކުރިން މަޖިލީހުގެ އިދާރާއަށް ހުށަހެޅުމަށް ވަނީ ފުރުސަތު ހުޅުވާލާފައެވެ.

އެޗްއާރުސީއެމްއަށް ކުރިމަތި ލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާ އިސްކަންދެއްވި 8 ބޭފުޅުންގެ ތެރޭގައި ހިމެނެނީ މަރިޔަމް ލައިޒާއާއި، އަލްއުސްތާޒު އިބްރާޒިމް ޒާހިދާއި، ޑރ.އަދުހަމް އަބްދުﷲއާއި، އާމިތަނު ޝިފާޒު އަބްދުއް ރައްޒާގާއި، ހުސެއިން އަމްރުއާއި، މޫމިނާ ވަހީދާއި، އަޒްލީމާ އަހުމަދުގެ އިތުރުން މުހައްމަދު ފައުޒީ އެވެ.

އެޗްއާރުސީއެމަށް މެންބަރުން އައްޔަން ކުރުމުގެ މަސައްކަތް ކުރަމުން ދަނީ އެ ކޮމިޝަނުގެ 3 މެންބަރަކު އިސްތިއުފާ ދެއްވާފައިވާތީ އާއި، އަދި އެ ކޮމިޝަންގެ މެންބަރެއްގެ މެންބަރުކަމުގެ މުއްދަތު، 12 ސެޕްޓެންބަރު 2020 ގެ ނިޔަލަށް ހަމަވާތީ، އެ މަޤާމުތަކަށް މެންބަރުން ޢައްޔަނުކުރުމަށެވެ.

އެޗްއާރުސީއެމަށް އައްޔަނުކުރައްވާފައިވާ މެންބަރުންގެ ތެރެއިން އެ ކޮމިޝަނުގެ ރައީސް ހިމެނޭހެން 3 މެންބަރަކު އިސްތިއުފާ ދެއްވާފައިވަނީ އެ މެންބަރުންނާ ގުޅޭ މައްސަލަތަކެއް ރައްޔިތުންގެ މަޖިލީހުން ބަލައި ބައެއް މެންބަރުން މަޤާމުން ވަކިކުރަން ނިންމާފައި ވަނިކޮށެވެ.