ސިޔާސީ ޕާޓީއެއްގެ މަސައްކަތެއް އެއްވެސް މުވައްސަސާ އެއްގެ ތެރޭގައި ކުރިކަމުގެ މައުލޫމާތެއް ރަސްމީކޮށް މިހާތަނަށް ލިބިފައިނުވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު މިއަދު ވިދާޅުވެއްޖެ އެވެ.

ހީނާ މިހެން ވިދާޅުވީ ޑީއެންއާރު ތެރޭގައި ޕީއެންސީގެ ފޯމް ފުރި ކަމަށް ދެކެވޭ ވާހަކަތަކާއި ގުޅިގެންނެވެެ. ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ، ސަރުކާރުގެ ސިޔާސަތަކީ އެއްވެސް މުވައްސަސާތަކަށް ނުފޫޒު ނުފޯރުވުން ކަމަށެވެ. ހީނާ ވިދާޅުވީ ސިޔާސީ ޕާޓީއެއްގެ މަސައްކަތެއް އެއްވެސް މުވައްސަސާ އެއްގެ ތެރޭގައި ކުރިކަމުގެ މައުލޫމާތެއް ރަސްމީކޮށް މިހާތަނަށް ލިބިފައިނުވާ ކަމަށެވެ.

"ސިޔާސީ ޕާޓީއެއްގެ މަސައްކަތްތަކެއް އެ މުވައްސަސާއެއްގައި ކުރިކަމުގެ މައުލޫމާތެއް އަދި ރަސްމީކޮށް މި އޮފީހަށް ލިބިފައެއް ނުވޭ، އެހެން ނަމަވެސް އަޅުގަނޑު މިދެންނެވީ ސިޔާސީ ޕާޓީއަކުން ކުރާ ކަމަކީ މި ޕޯޑިއަމްގައި އަޅުގަނޑަށް އެކަމާ ގުޅޭގޮތުން މައުލޫމާތު ދެވޭނެ ކަމެއް ނޫން، ސަރުކާރުގެ ސިޔާސަތު މި ހާމަކުރީ ސަރުކާރުގެ މައިގަނޑު ސިޔާސަތަކީ އެއްވެސް މުވައްސަސާއެއްގެ މަސައްކަތަށް ނުފޫޒު ނުފޯރުވުން." ހީނާ ވިދާޅުވިއެވެ.

މީގެ އިތުރުން ހީނާ ވިދާޅުވީ ސަރުކާރުގެ މުވައްސަސާ އަކަށް ނުފޫޒު ފޯރުއްވުމަކީ ރައީސް މުޢިއްޒުގެ ވިސްނުންފުޅެއް ނޫން ކަމަށެވެ. އަދި އެމަނިކުފާނުގެ ވިސްނުންފުޅަކީ ސަރުކާރުގެ މިނިވަން މުވައްސަސާއެއް މިނިވަންކަމާއި މުސްތަޤިއްލު ކަމާއެކު ހަރުދަނާ ނިޒާމެއްގެ ތެރެއިން ހަަރުދަނާކަމާއެކު، ރައްޔިތުންނަށް ޚިދުމަތް ކުރުމުގައި އެމުވައްސަސާތަކަށް ކަނޑައެޅިފައިވާ މަސައްކަތް ކުރެވޭނެ މުވައްސަސާ އަކަށް ހެދުން ކަމަށް ހީނާ ވިދާޅުވިއެވެ. އަދި ކުރިއަށް އޮތްތާގައި ވެސް އެކަން ހިނގަމުންދާނީ އެގޮތަށް ކަމަށް ހީނާ ވިދާޅުވިއެވެ.