ސަރުކާރު ޖަވާބުދާރީ ކުރުވުން 'ކަފުން ކުރަން' މަސައްކަތް ކުރަމުންދާ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް ތުުހުމަތުކުރަށްވައިފިއެވެ.

ފައްޔާޒު މިހެން ވިދާޅުވީ ސިޔާސީ ޕާޓީތައް 100،000ރ. އިން ޖޫރިމަނާ ކުރެވޭ ގޮތަށް ގާނޫނު އިސްލާހުކުރަން ސަރުކާރުގެ ފަރާތުން މަޖިލީހަަށް ބިލެއް ހުށައެޅުމާއި ގުޅިގެންނެވެެ. އެކަމަށް އިޝާރަތްކުރައްވައި އެމްޑީޕީގެ ޗެއާޕާސަން ފައްޔާޒު އިސްމާޢިލް ވިދާޅުވީ ވޭތުވެދިޔަ 20 އަހަރުތެރޭ ރައްޔިތުންގެ ބާރުވެރިކަން ގާއިމުކުރުމަށާއި، ޚުދުމުޚުތާރު ވެރިކަމަކުން އުފެދޭ ބޭއިންސާފާއި އަނިޔާވެރިކަން ގަބޫލުނުކުރާ ފިކުރު އަށަގެންނެވުމަށް އެމްޑީޕީން ކުރަމުން ގެންދިޔަ މަސައްކަތް ރޫޅާލަމުންދާ ކަމަށެވެ.

"މިހާރު ހުށަހަޅާފައި ހުރި ބިލުތަކަކީ ރައްޔިތުންގެ ބާރުވެރިކަމާއި ސަރުކާރު ޖަވާބުދާރީކުރުމަށް އޮތް އަސާސްތައް ކަފުން ކުރުމަށް މި ސަރުކާރުން ތަންފީޒުކުރަމުންދާ އެޖެންޑާގެ ތެރެއަށް އިތުރުވި ޖަރީމާއެއް،" ފައްޔާޒު ކުރެއްވި ޕޯސްޓުގައި ލިޔުއްވިއެވެ.

މީގެ އިތުރުން ފައްޔާޒު ވިދާޅުވީ ސަރުކާރެއް ބަދަލުވާއިރަށް ހައްގުތައް އުނިކޮށް، މުޅި ނިޒާމު ބަދަލުކޮށްލުމަށް އޮންނަ ފުރުސަތު ނައްތާލުން މުހިންމު ކަމަށެވެ. އަދި ފާއިތުވެދިޔަ 16 އަހަރުގެ ތަޖުރިބާއިން އިބުރަތް ހާސިލުކޮށް ގާނޫނުއަސާސީއާ މެދު އަލުން ނަޒަރު ހިންގައި، އެ ގާނޫނުއަސާސީން އެކަށައެޅި އުސޫލުތައް ނުރޫޅޭނޭ ގޮތަށް ބޮޑެތި ބަދަލުތަކެއް ގެނައުމަށް ފަރުވާތެރިކަމާއެކު މަސައްކަތް ކުރަންޖެހޭ ކަމަށް ފައްޔާޒު ވިދާޅުވިއެވެ. އަދި އެ މަސައްކަތް އެމްޑީޕީން ފަށާނެ ކަމަށް ފައްޔާޒު ވިދާޅުވިއެވެ.