މޯލްޑިވްސް މީޑިއާ ކައުންސިލުން ހޮވާ އަހަރުގެ އެންމެ މޮޅު ނޫސްވެރިޔާގެ އިނާމު "މިހާރު" ނޫހުގެ ފާތިމަތު ޝަނާ މުހައްމަދު ހާސިލުކޮށްފިއެވެ.

ރާއްޖޭގެ މިދިޔަ އަހަރުގެ އެންމެ މޮޅު ނޫސްވެރިޔާގެ އެވޯޑް ޝަނާ އަށް ދީފައިވަނީ މިރޭ ބޭއްވި އެވޯޑް ހަފުލާގައެވެ. ޝަނާއަށް އެވޯޑް ހަވާލުކޮށްދެއްވީ ޖަލްސާގެ ޝަރަފުވެރި މެހެމާނު، ނައިބު ރައީސް، އަލްއުސްތާޒު ހުސައިން މުހައްމަދު ލަތީފް އެވެ. މީޑިއާ ކައުންސިލުން ބޭއްވި ހަފުލާގައި އަހަރުގެ އެންމެ މޮޅު ނޫސްވެރިޔާގެ އެވޯޑު ޝަނާ ހާސިލުކުރީ ކުޅަދާނަ ހަތަރު ނޫސްވެރިޔަކާއި ވާދަކޮށްގެންނެވެ.

އެންމެ މޮޅު ނޫސްވެރިޔާގެ މަގާމުގެ އިތުރުން ޝަނާ ވަނީ ވިޔަފާރި އާއި އިގުތިސާދީ ދާއިރާއިން ވެސް އެންމެ މޮޅު ނޫސްވެރިޔާގެ އެވޯޑު ހާސިލު ކޮށްފަ އެވެ.

ރޭގެ އެވޯޑް ހަފުލާގައި އަހަރުގެ އެންމެ އުއްމީދީ ނޫސްވެރިޔާއާއި އަހަރުގެ އެންމެ މޮޅު ކަވަރޭޖާއި ތަހުގީގީ ނޫސްވެރިކަމުގެ ދާއިރާއާއި ވީޑިއޯ ޑޮކިއުމެންޓްރީ ދާއިރާގެ އިތުރުން ފީޗާ ރިޕޯޓުގެ ދާއިރާއިން ވެސް ނޫސްވެރިންނަށް އެވޯޑު ވަނީ ދީފައެވެ.

މީގެ އިތުރުން މިރޭ ވަނީ "އާފަތިސް" ނޫހުގެ ކުރީގެ އެޑިޓަރު އަހުމަދު ޒާހިރު (ފެއަރީ ޒާހިރު) އަދި ދައުރު ނޫހުގެ އެޑިޓަރު މޫސާ ލަތީފަށް ނޫސްވެރިކަމުގެ ދާއިރާއިން ލައިފްޓައިމް އެޗީވްމެންޓް އެވޯޑް ވެސް ދީފައެވެ. މި ދެބޭފުޅުންނާ އެވޯޑު ހަވާލު ކޮށްދެއްވީ ނައިބު ރައީސް ހުސައިން މުހައްމަދު ލަތީފެވެ.