ކ. އަތޮޅު ތިލަފުށީގެ ކުޑަގިރި ފަރަށް އެރި އަވައްޓެރި އިންޑިޔާގެ ބޯޓުން 14 ދުވަސްތެރޭ ތިން މިލިއަން ރުފިޔާ ދައުލަތަށް ދައްކަން ސިވިލް ކޯޓުން އެ ބޯޑުގެ ވެރިފަރާތަށް ހުކުމްކޮށްފިއެވެ.

މި މައްސަލައިގައި މިއަދު ސިވިލް ކޯޓުން ހުކުމް ކޮށްފައި ވަނީ ”އޭއެމް އެމްއެސްވީ މަރިޔާ ސިންތަޔަތިރައި ރިޔަނަ" ނަމަކަށް ކިޔާ ބޯޓުގެ ވެރިފަރާތުގެ މައްޗަށެވެ. މި ބޯޓު ކުޑަގިރި ފަރަށް އެރީ މިދިޔަ އަހަރުގެ ޖެނުއަރީ 31 ގަ އެވެ. އެ މައްސަލާގައި އެންވަޔަރަމެންޓް ޕްރޮޓެކްޝަން އެޖެންސީ(އީޕީއޭ) އިން ވަނީ އެ ބޯޓުގެ ވެރިފަރާތް ތިން މިލިއަން ރުފިޔާއިން ޖޫރިމަނާކޮށްފަ އެވެ.

މި ބޯޓުގެ ވެރިފަރާތަށް އީޕީއޭ އިން ދިން މުއްދަތުގައި ފައިސާ ދެއްކިފައި ނުވާތީ ދައުލަތުން ވަނީ އެ ބޯޓުގެ ވެރިފަރާތާއި ބޯޓުގެ ރާއްޖޭގެ އޭޖެންޓާ ދެކޮޅަށް ދައުވާކޮށްފަ އެވެ. އެ ބޯޓުގެ ވެރިފަރާތަކީ އިންޑިއާގެ ކުންފުންޏެއް ކަމަށްވާ އެސްއެމްޓީޓީ. ޖެސިންތަ އެވެ. އަދި ރާއްޖޭގެ އޭޖަންޓަކީ ބިގް ވޭވް ޕްރައިވެޓް ލިމިޓެޑެވެ.

ސިވިލް ކޯޓުން މިއަދު ވަނީ މި މައްސަލައިގައި ދައުވާ ލިބޭ ފަރާތުގެ ޣައިރު ހާޒިރުގައި ހުކުމް އިއްވާފައެވެ. އެއީ ދައުވާ ލިބޭ ފަރާތްތަކަށް ކޯޓުން ދައުވާގެ ލިޔެކިޔުންތައް ހަވާލުކުރި ނަމަވެސް ޖަވާބެއް ހުށަހަޅާފައި ނުވާތީ ކަމަށް ހުކުމުގައިވެ އެވެ.

ކޯޓުން މިއަދު ހުކުމްކުރީ އެ ބޯޓުގެ ވެރިފަރާތުން މިއަދުން ފެށިގެން 14 ދުވަހުގެ ތެރޭގައި، ޖޫރިމަނާއަށް ވާ 3،098،710ރ. ދައުލަތަށް ދެއްކުމަށެވެ.

އީޕީއޭއިން ކުރިން ބުނެފައިވާ ގޮތުގައި، އެ ބޯޓު ފަރަށް އެރުމުގެ ސަބަބުން 130 އަކަމީޓަރުގެ ސަރަހައްދަކަށް އެކިވަރުގެ ގެއްލުން ލިބިފައިވާކަން ބޯޓުގެ ވެރިފަރާތުން ހިއްސާ ކޮށްފައިވާ ސާވޭ ރިޕޯޓުން ވެސް ފާހަގަވާ ކަމަށެވެ.