ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދު ފުއްދުމުގެ ގޮތުން ސިވިލް ސާވިސް މުއައްޒަފުންގެ މުސާރަ ބޮޑުކުރުމަށް ނިންމައި އަންނަ އަހަރުގެ ބަޖެޓްގައި އެފައިސާ ހިމަނާފައިފި އެވެ.

މިއަދު ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަމުން ފިނޭންސް މިނިސްޓަރު މޫސާ ޒަމީރު ވިދާޅުވީ، ސިވިލް ސާވިސް މުވައްޒަފުންގެ ތެރެއިން މިހާތަނަށް ޕޭ ހާމަނައިޒްކޮށްފައިނުވާ ހުރިހާ މުވައްޒަފުންގެ މުސާރަތަކަށް ބަދަލުގެންނަން ކުރިއަށް އޮތް އަހަރުގެ ބަޖެޓުގައި ހިމަނާފައިވާނެ ކަމަށެވެ.

ވަޒީރު ވިދާޅުވީ ޖުޑީޝަރީގެ މުވައްޒަފުންވެސް ހިމެނޭގޮތަށް ސިވިލް ސާވިސް މުވައްޒަފުންގެ މުސާރަތަކަށް ބަދަލުގެނެސް ހާމަނައިޒްކުރަން ބަޖެޓުގައި 500 މިލިއަން ރުފިޔާ ހިމަނާފައި ވާނެ ކަމަށެވެ. އަދި އެނޫން އެހެން ހުރިހާ މުވައްޒަފުންގެ މުސާރަތަކަށް 2026 ވަނަ އަހަރު ބަދަލުގެނައުމަށް ރާވާފައިވާކަމަށް ވަޒީރު ވިދާޅުވިއެވެ. 

މި ސަރުކާރުން ވަނީ ވައުދުތަކާ އެއްގޮތަށް ދައުލަތުގެ މުއައްޒަފުންގެ ތެރެއިން ޓީޗަރުންނާއި، ސިއްހީ ދާއިރާގެ އިތުރުން ސަލާމަތީ ހިދުމަތްދޭ މުއައްސަސާތަކުގެ މުއައްޒަފުންގެ މުސާރަތައް މީގެ ކުރިން ބޮޑުކޮށްފައެވެ.

އަންނަ އަހަރަށް ލަފާކޮށް ސަރުކާރުން ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ. މިއީ މިއަހަރަށް ހުށަހެޅި ބަޖެޓަށްވުރެ، 6.8 ބިލިއަން ރުފިޔާގެ އިތުރު އަދަދެކެވެ.

2025 ވަނަ އަހަރަށް ހުށަހަޅާފައިވާ ދައުލަތުގެ ބަޖެޓުގެ ޖުމްލައަކީ 56,647,600,859 (ފަންސާސް ހަ ބިލިއަން، ހަސަތޭކަ ސާޅީސް ހަތް މިލިއަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ.