ކައުންސިލްތަކަށް ބްލޮކްގްރާންޓްގެ ގޮތުގައި ދައުލަތުގެ ބަޖެޓުން ދޭން ގާނޫނުގައި ހަމަޖައްސާފައި އޮންނަ ފައިސާކޮޅު ވެސް ކުރިއަށް އޮތް 2025 ވަނަ އަހަރުގެ ބަޖެޓުން ވަނީ އުނިކޮށްފައިކަމަށް އެމްޑީޕީގެ ޕީޖީ ގްރޫޕްގެ ލީޑަރު އިބްރާހީމް ނާޒިލް ވިދާޅުވެއްޖެއެވެ.

މިރޭ އޮތް އެމްޑީޕީ ހަރުގެ ޖަލްސާގައި ވާހަކަ ދައްކަވަމުން ނާޒިލް ވިދާޅުވީ، ނިމިދިޔަ އެމްޑީޕީ ވެރިކަމުގައި 19 ވަނަ މަޖިލީހުން ލާމަރުކަޒީ ގާނޫނަށް ގެނެވުނު މުހިންމު ބޮޑެތި އިސްލާހުތަކުގެ ތެރޭގައި ބޮލޮކް ގްރާންޓްގެ ގޮތުގައި ބަޖެޓުގެ 5 ޕަސެންޓް ކައުންސިލްތަކަށް ދޭން ޖެހޭނެ ކަމަށް ލިޔެފައި އޮންނާނެ ކަމަށެވެ.

ނަމަވެސް، މިއަދު މަޖިލީހަށް ހުށަހެޅި ބަޖެޓުގައި އެ ފައިސާކޮޅު ވެސް ވަނީ ކާލާފައި ކަމަށް ނާޒިލް ވިދާޅުވިއެވެ.

އޭނާ ވިދާޅުވީ 2023 ވަނަ އަހަރަށް ފާސްކުރީ 49.9 ބިލިއަން ރުފިޔާގެ ބަޖެޓެއްކަމަށެވެ. ނަމަވެސް، މިއަދު ސަރުކާރުން ހުށަހެޅީ 56.1 ބިލިއަން ރުފިޔާގެ ބަޖެޓެއް ކަމަށާއި އެ ފައިސާއިން ކައުންސިލްތަކަށް ހާއްސަކޮށް ދޭންޖެހޭ ފައިސާ ހަމައަށް ހިމަނާފައިނުވާތީ އެކަމުގެ ކަންބޮޑުވުން ނާޒިލު ވަނީ ފާޅު ކުރައްވާފައެވެ.

ގާނޫނު ބުނާގޮތުން ކައުންސިލްތަކަށް ދައުލަތުގެ އާމްދަނީގެ 5 އިންސައްތަ ބްލޮކް ގްރާންޓްގެ ގޮތުގައި ދޭންޖެހެއެވެ. އެ ފައިސާ ދެނީ ހަމަޖައްސާފައި އޮންނަ ވަކި ފޯމިއުލާއަކުންނެވެ. ނަމަވެސް މި އަހަރުގެ ބަޖެޓުގައި ބައެއް ކައުންސިލްތަކުގެ ބްލޮކް ގްރާންޓް ފައިސާގެ އަދަދު މަދުކޮށްފައިވާކަން ބަޖެޓު ތަފުސީލުތަކުން އެނގެއެވެ.