ނަސްރުގެ ދުވަހާ ގުޅިގެން ދިވެހިރާއްޖޭގެ ގައުމީ ދިފާއީ ބާރު(އެމްއެންޑީއެފް) އިން ބާއްވާ އަސްކަރީ ދައްކާލުން މިއަދު ހަވީރު އޮންނާނެކަމަށް އެތަނުން ބުނެފިއެވެ.

އެމްއެންޑީއެފުން ބުނީ އާއްމުންނަށް ހުޅުވާލައިގެން ބާއްވާ މި ހަރަކާތް 4:15 ގައި ޖުމްހޫރީ މައިދާނުގައި އޮންނާނެ ކަމަށެވެ. އަސްކަރީ ދައްކާލުމުގައި އެމްއެންޑީއެފުން ގެންގުޅޭ އެކި އުޅަނދުތަކާއި ބަޑިތައް ދައްކައިލާނެ ކަމަވެސް އަސްކަރިއްޔާއިން ވަނީ ހާމަކޮށްފައެވެ.

ނަސްރުގެ ދުވަހާ ގުޅުވައިގެން އެމްއެންޑީއެފުން މިއަދު ވަނީ ނޮވެންބަރު 3، 1988 ގެ އުދުވާނީ ހަމަލާގެ ހަނދާންތަކާ ގުޅޭ އެތައް ހަނދާނެއް ދައްކުވައިދޭ މައުރަޒެއް ވެސް ފަށައިފައެވެ.

މިއަދު ހެނދުނު އާޓް ގެލެރީގައި ފެށި މި މައުރަޒު މި މަހުގެ ނުވަ ވަނަ ދުވަހާ ހަމައަށް ކުރިއަށް ގެންދަން އޮތީ ނިންމާފައެވެ. މިއީ އާންމުންނަށް ހުޅުވާލާފައިވާ މައުރަޒެއްކަން ފާހަގަ ކުރެވެއެވެ.