ސިފައިންނާއި ފުލުހުން ތަމްރީނުކުރަން އަންނަ އަހަރު ނެޝަނަލް ސާވިސް ޕްރޮގްރާމެއް ފަށަން ނިންމާފައިވާކަން ރައީސުލްޖުމްޙޫރިއްޔާ ޑރ. މުހައްމަދު މުއިއްޒު މިރޭ އިއުލާންކުރަށްވައިފިއެވެ.

ނަސްރުގެ ދުވަސް ފާހަގަކުރުމަށް މިރޭ ބޭއްވި ޚާއްސަ ޖަލްސާގައި ވާހަކަފުޅު ދައްކަވަމުން ރައީސް ޑރ.މުޙައްމަދު މުޢިއްޒު ވިދާޅުވީ ސިފައިންނާއި ފުލުހުން ތަމްރީނުކުރަން އަންނަ އަހަރު ނެޝަނަލް ސާވިސް ޕްރޮގްރާމެއް ފަށަން ނިންމާފައިވާ ކަމަށެވެ. އެ ޕްރޮގުރާމަކީ 400 މިލިއަން ރުފިޔާ ބަޖެޓުކޮށްގެން، ހިންގާ ޕްރޮގުރާމެއް ކަމަށާއި އެ ޕްރޮގްރާމުގެ ތެރެއިން ކުރިއަށް އޮތް ހަތަރު އަހަރު، 4،000 ސިފައިންނާއި 1،000 ފުލުހުން ތަމްރީނު ކުރާނެ ކަމަށް ރައީސް ވިދާޅުވިއެވެ.

"މިއަހަރުގެ ބަޖެޓުގައި 400 މިލިއަން މިކަަމަށް ޚާއްސަކުރެވިގެންދާނެ، އަދި ކޮންމެ އަހަރަކު އިތުރު 400 މިލިއަން އިތުރުކުރެވޭނެ އެއީ ހިސާބު ޖަހައި ކަމާއި ބެހޭ ވުޒާރާތަކުގެ ހިސާބުތައް ހޯދައި ހުރިހާ ކަމެއް ކަލްކިޔުލޭޓްކޮށް، މިއީ ފައިނަލް ކުރެވިފައި ހުރި އަދަދުތަކެއް. މިއަދަދަށް 400 މިލިއަން ރުފިޔާ އިން ކޮންމެ އަހަރަކު ސިފައިންގެ އަށް 1000 ކުދިން ފުލުހަށް 250 ކުދިން ވެއްދޭނެ." ރައީސް ވިދާޅުވިއެވެ.

މީގެ އިތުރުން ރައީސް މުޢިއްޒު ވިދާޅުވީ އޯލެވެލް އަދި އޭލެވެލް ނިންމާ ކުދިންގެ ތެރެއިން ބޮޑު އިންސައްތައެއްގެ ދަރިވަރުންނަށް މަތީ ތަޢުލީމުގެ ފުރުސަތު ނުލިބޭ ކަމަށެވެ. އަދި މިފަދަ ކުދިންނަކީ މުޖުތަމަޢަށް ބޭނުންހިފޭ ބަޔަކަށް ހަދަން ޖެހޭ ކަމަށް ރައީސް ވިދާޅުވިއެވެ. މިކަމަށް ހައްލެއް ހޯދުމުގެ ގޮތުން ޤައުމީ ޚިދުމަތުގެ ގޮތުގައި އަންނަ އަހަރުން ފެށިގެން ޤައުމީ ޕްރޮގްރާމެއް ފެށިގެންދާނެ ކަމަށް ރައީސް ވިދާޅުވިއެވެ. އަދި މި ޕްރޮގްރާމަށް ޤާނޫނީ ބާރު ލިބިގެންދާނެ ކަމަށްވެސް ރައީސް މުޢިއްޒު ވިދާޅުވިއެވެ.

"ޖުމުލަ 5000 ކުދިން ކުރިއަށް އޮތް ހަތަރު އަހަރުތެރޭގައި މަގުމަތީގައި ބާކީވެފައި ތިބުމުގެ ބަދަލުގައި ފުލުހުންގެ ތަމްރީން ސިފައިންގެ ތަމްރީން ލިބިފައި ތިބި އަހުލާޤު ރަނގަޅު ގައުމަށް ފައިދާހުރި މުޖުތަމައު އަށް ފައިދާ ހުރި ބަޔެއްގެ ވެގެންދާނެ އިރާދަކުރެއްވިއްޔާ،" ރައީސް ވިދާޅުވިއެވެ.