ނޮވެމްބަރު 3، 1988ގައި ޝަހީދުވި ބޭފުޅުންގެ އާއިލާތަކަށް އަންނަ އަހަރުން ފެށިގެން އެލަވަންސެއްދީ، އެ އާއިލާތަކަށް ޚާއްސަކޮށްގެން 50 ޔުނިޓްގެ ހައުސިން އިމާރާތެއް އެޅުމަށް ނިންމާފައިވާ ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެ އެވެ.

ނަސްރުގެ ދުވަސް ފާހަގަކުރުމަށް މިރޭ ބޭއްވި ރަސްމީ ޖަލްސާގައި ވާހަކަފުޅުދައްކަވަމުން ރައީސް ޑރ.މުޙައްމަދު މުޢިއްޒު ވިދާޅުވީ މީގެކުރިން ޝަހީދުވި ބޭފުޅުންގެ އާއިލާތަކަށް ކޮންމެވެސް ވަރެއްގެ ފައިސާގެ އެހީއެއް ދިން ކަމަށެވެެ. އެހެން ނަމަވެސް ފަހަކަށް އައިސް އެކަން ހުއްޓިފައިވާ ކަމަށާއި އެއީ ވަރަށް ބޮޑު ބޭއިންސާފެއް ކަމަށް ރައީސް ވިދާޅުވިއެވެ.

އެމަނިކުފާނު ވިދާޅުވީ ޝަހީދުވި ބޭފުޅުންގެ އާއިލާތަކަށާއި ނޮވެމްބަރު ތިނެއްގައި މެޑަލް ފޯ އެކްސެޕްޝަނަލް ބްރޭވަރީ ލިބުނު ފަސް ފަރާތަށާއި މެޑަލް ފޯ ބްރޭވަރީ ލިބިފައިވާ 10 ފަރާތަށް، ގެޒެޓް ކުރާ އުސޫލެއްގެ ދަށުން އަންނަ އަހަރުން ފެށިގެން ސަރުކާރުން ދެމެހެއްޓެނިވި ގޮތެއްގައި ހާއްސަ އެލަވަންސެއް ދޭން ނިންމާފައިވާ ކަމަށެވެ. ރައީސް ވިދާޅުވީ އެ އާއިލާތަކަށް ދިނުމަށް 50 ޔުނިޓްގެ ހައުސިން އިމާރާތެއް އެޅުމުގެ މަޝްރޫއެެއް ފަށަން ނިންމާފައިވާ ކަމަށެވެ.

"ޝަހީދުންގެ ހިޔާގެ ނަމުގައި 50 ހައުސިން ޔުނިޓް ހިމެނޭ ހައުސިން އިމާރާތެއް ކުރިއަށް އޮތް އަހަރުތަކުގައި، މި ދައުރުގެ ތެރޭގައި އަޅައި ނިންމައި މި އާއިލާތަކާ ހަވާލުކުރާނަން،" ރައީސް މުޢިއްޒު ވިދާޅުވި އެވެ.