މިއަހަރު މަތީ ސާނާވީއަށް ކިޔަވާ ކުދިންގެ އަދަދު 38 އިންސައްތަ އަށް އިތުރުކުރެވިފައިވާ ކަމަށް އެޑިޔުކޭޝަން މިނިސްޓަރު ޑރ. އިސްމާޢިލް ޝަފީޢު މިރޭ ވިދާޅުވެއްޖެއެވެ.

ކުރީގެ ސީއެޗްއެސްއީ އިމާރާތް ރަސްމީކޮށް ހުޅުވުމަށް މިރޭ ބޭއްވި ހަފްލާގައި ވާހަކަފުޅު ދައްކަވަމުން އެޑިއުކޭޝަން މިނިސްޓަރު ޑރ. އިސްމާޢިލް ޝަފީޢު ވިދާޅުވީ މަތީ ސާނާވީ އަށް ސަރުކާރުގެ ސުކޫލުތަކުގައި ކިޔަވާ ދަރިވަރުންގެ ނިސްބަތް މިއަހަރު އިތުރުކުރެވިފައިވާ ކަމަށެވެ. އެގޮތުން މީގެ ކުރިން މަތީ ސާނާވީއަށް ކިޔަވާ ކުދިންގެ ދަރިވަރުންގެ އަދަދު އުޅެނީ 1100 ( އެގާރަ ސަތޭކަ) ގައި ކަމަށާއި އެހެން ނަމަވެސް މިހާރު އެ އަދަދު 2000 (ދެހާސް) އާއި ގާތްކުރާ އަދަދަކަށް މަތިކުރެވިފައިވާ ކަމަށް މިނިސްޓަރު ޝަފީޢު ވިދާޅުވިއެވެ.

"މުޅި މާލެ އާއި އަތޮޅުތަކުގެ ޕަބްލިކް ސުކޫލަށް ބަލާކަމުގައި ވަނީނަމަ މިއީ 77 އިންސައްތައިގެ އިތުރުވުމެއް، ހަމަައެކަނި މާލެ އަށް ބަލައިފިކަމުގައި ވަނީނަމަ 109 އިންސައްތައިގެ އިތުރުވުމެއް. މި ސަތޭކަ ނުވަ އިންސައްތަ މި އިތުރުވީ މާލޭގެ ތަނެއްގެ ގޮތުގައި ހުޅުމާލެ ވެސް ބަލާތީވެ ހުޅުމާލޭގެ ސީއެޗްއެސްސީ އާއި މާލޭގެ ސީއެޗްއެސްސީގެ ޖުމުލަ އެއްކޮށްލުމުން މިދިޔަ އަހަރު ޕަބްލިކް ސުކޫލުތަކުގައި ކިޔަވާ ކުދިންގެ އަދަދު 109 އިންސައްތައަށް މިވަނީ މަތިވެފައި،" މިނިސްޓަރު ވިދާޅުވިއެވެ.