މާލޭ ސަރަހައްދުގައި ގަވާއިދާ ޚިލާފަށް އުޅޭ ފަސް ބިދޭސީއަކު ހައްޔަރުކޮށްފައިވާ ކަމަށް އިމިގްރޭޝަނުން ބުނެފިއެވެ.

އިމިގްރޭޝަނުން ބުނީ އިއްޔެ އެ އިދާރާއިން މާލޭގައި ހިންގި ޚާއްޞަ އޮޕަރޭޝަނުގެ ތެރެއިން ފަސް މީހަކު ހައްޔަރުކޮށްފައިވާ ކަމަށެވެ. އެމީހުން ހައްޔަރުކޮށްފައި ވަނީ އިއްޔެ ކުރިއަށް ގެންދިޔަ ރެއިޑު އޮޕަރޭޝަނުގައި މާލޭގައި ހުންނަ ރެސްޓޯރެންޓެއް ބަލައި ފާސްކުރުމުގެ ތެރޭގައެވެ.

އެ އޮޕަރޭޝަނުގެ ތެރެއިން ހައްޔަރުކުރީ ސައްހަ ވިސާއެއް ނެތި، ގަވާއިދާ ޚިލާފަށް އެތަނުގައި މަސައްކަތް ކުރަމުން ދިޔަ ބިދޭސީންތަކެއް ކަމަށް އިމިގްރޭޝަނުން ވަނީ ބުނެފައެވެ.

ރާއްޖޭގައި ގަވާއިދާ ޚިލާފަށް އުޅެމުން އަންނަ ބިދޭސީން ހޯދައި، އެމީހުންނާއި މެދު ފިޔަވަޅު އެޅުމުގެ މަސައްކަތް މި ސަރުކާރުން ބާރު ސްޕީޑުގައި ކުރަމުންދާކަން ފާހަގަ ކުރެވެއެވެ. މި މަސައްކަތުގެ ތެރެއިން މިހާތަނަށް 4،000 އަށްވުރެ ގިނަ ބިދޭސީން ވަނީ ޑީޕޯޓް ކޮށްލާފައެވެ.

މިދިޔަ އަހަރުގެ ނޮވެންބަރު މަހުގެ 17 ވަނަ ދުވަހުން ފެށިގެން މިދިޔަ މަހުގެ 17 ވަނަ ދުވަހާއި ހަމައަށް ގަވާއިދާ ޚިލާފަށް ރާއްޖޭގައި އުޅުނު 4054 ބިދޭސީން އަނބުރައި އެ މީހެއްގެ ޤައުމަށް ފޮނުވާފައިވާ ކަމަށް އިމިގްރޭޝަނުން ހިއްސާކޮށްފައިވާ ތަފާސް ހިސާބުތަކުން ދައްކައެވެ.