ރާއްޖޭގައި ވޭޕްގެ ބާވަތްތައް މަނާ ކުރުމަށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލް ކޮމެޓީން ފާސްކޮށްފިއެވެ.

ރައީސް ޑރ. މުޙައްމަދު މުޢިއްޒުގެ ހާއްސަ ނިންމެވުމެއްގެދަށުން ވަނީ މި އަހަރުގެ ޑިސެންބަރު މަހުގެ 15 ވަނަ ދުވަހުން ފެށިގެން ރާއްޖޭގައި ވޭޕާއި ވޭޕްގެ ބާވަތްތައް ބޭނުން ކުރުން މަނާކުރުމަށް، ދުންފަތް ކޮންޓްރޯލް ކުރުމާއިބެހޭ ގާނޫނު އިސްލާހު ކުރަން މަޖިލީހަށް ފޮނުވާފައެވެ.

ބިލުގައި ދުންފަތް ކޮންޓްރޯލް ކުރުމުގެ ގާނޫނަށް މައިގަނޑު ތިން އިސްލާހެއް ގެންނަން ވަނީ ހުށަހަޅާފައެވެ. އެގޮތުން، މި މަހުގެ 15 ވަނަ ދުވަހުން ފެށިގެން ރާއްޖޭގައި ވޭޕް ބޭނުން ކުރުން މަނާކޮށް އަދި ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 21 އަހަރު ކަމަށް ހެދުމަށް ވަނީ ހިމަނާފައެވެ.

އޭގެ އިތުރުން، މި އަހަރުގެ ޑިސެންބަރު މަހުގެ 15 ވަނަ ދުވަހުން ފެށިގެން ރާއްޖޭގައި ވޭޕް ބޭނުންކުރުން މަނާކުރަން ވެސް ވަނީ ހިމަނާފައެވެ. އަދި އެއާއި ހިލާފުވާ ފަރާތްތަކަށް ބޮޑެތި ޖޫރިމަނާތައް ވެސް ބިލުގައި ވަނީ ހިމަނާފައެވެ.

ވޭޕް މަނާ ކުރުމުގެ ބިލް އިޖުތިމާއީ ކޮމެޓީން މިއަދު ފާސްކުރީ ބިލް ދިރާސާކުރުމަށް ދިގު މުއްދަތެއް ހޭދަވާނެކަމަށް ބެލެވިފައި ވަނިކޮށެވެ.