ގޭންގު މާރާމާރީއާއި ގުޅިގެން 4 ޒުވާނަކު ޝަރީއަތް ނިމެންދެން ބަންދުކޮށްފިއެވެ.

ކްރިމިނަލް ކޯޓުން މިއަދު ކޮށްފައިވާ ހުކުމެއްގައި ބުނެފައިވަނީ، ތޫނު ހަތިޔާރު ބޭނުންކޮށްގެން ގޭންގު މާރާމާރީ ހިންގުމުގެ ތުހުމަތުގައި 21 އަހަރުގެ ދެ ޒުވާނުންނާއި 22 އަހަރުގެ ޒުވާނެއްގެ އިތުރުން 23 އަހަރުގެ ޒުވާނަކު ތަހުގީގު އަދި ޝަރީއަތް ނިމެންދެން ބަންދުކުރަން ހުކުމް ކޮށްފައިވާކަމަށެވެ.

ފުލުހުން ހުށަހަޅާފައިވާ ބަޔާންތަކުގައި އެއީ ކޮން މައްސަލަތަކެއްކަން ފާހަގަކޮށްފައި ވީނަމަވެސް، ކޯޓު ހުކުމްގައި އެއީ ކޮން މައްސަލަތަކަކާއި ގުޅިގެން ބަންދުކުރި ބައެއްކަމެއް ތަފުސީލުކޮށްދީފައެއް ނުވެއެވެ.

ނަމަވެސް، އެ މީހުން ބަންދުކުރުމަށް އެކަށީގެންވާވަރަށް ހެކި ހުށަހަޅާފައިވާކަމަށް ކޯޓު އަމުރުގައި ބުނެފައިވެއެވެ. އޭގެ ތެރޭގައި ތަހުގީގީ ބަޔާންތަކާއި، ސީސީޓީވީ ފުޓޭޖާއި އިންޓެލިޖެންސް ރިޕޯޓުގެ އިތުރުން ވެސް އިތުރު ހެކި ހުށަހަޅައިފައިކަން ފާހަގަކޮށްފައިވެއެވެ.