ވޯލްޑް ބޭންކުގެ އެހީގައި ފެށި މެރިކަލްޗަރ ކޯހުގެ ދެވަނަ ބުރު ނިންމާލައި ބައިވެރިންނަށް ސެޓްފިކެޓް ދީފިއެވެ.

މަނިޔަފުށީ ރިސަރޗް އެންޑް ޓްރެއިނިން ފެސިލިޓީގައި މިއަދު ބޭއްވި ރަސްމިއްޔާތެއްގައި މި ކޯހުގެ ބައިވެރިންނަށް ސެޓްފިކެޓް ހަވާލުކޮށްދެއްވީ މަސްވެރިކަމާ ބެހޭ ވަޒީރު އަޙްމަދު ޝިޔާމެވެ.

ދެ ހަފުތާގެ މުއްދަތަށް ކުރިއަށް ގެންދިޔަ މި ކޯހުގައި ރާއްޖޭގެ އެކި ކަންކޮޅުތަކުން ޖުމްލަ 16 ބައިވެރިވެރިން ބައިވެރިވި އިރު އޭގެ ތެރެއިން 14 ބައިވެރިން ވަނީ ސެޓްފިކެޓް ހާސިލުކޮށްފައެވެ.

ވޯލްޑް ބޭންކުގެ އެހީގައި މަސްވެރިކަމާބެހޭ ވުޒާރާއިން ހިންގާ ޓްރާންސްފޯމް ޕްރޮޖެކްޓުގެ އެހީތެރިކަމާ އެކު މޯލްޑިވްސް މެރިން ރިސަރޗް އިންސްޓިޓިއުޓުން ހިންގި މި ކޯހުގެ މަގުސަދަކީ، ރާއްޖޭގައި މެރިކަލްޗަރ ސިނާއަތެއް ތައާރަފުކޮށް ތަރައްޤީކުރުމަށް ބޭނުންވާ ދިވެހި ފަންނުވެރިން އުފެއްދުމެވެ.

އެކުއަކަލްޗަރުގެ ނިޒާމުތަކާއި، ދިރޭ ކާނާ އާލާކުރުމާއި، ފާނަޔާއި ހުއިފިލަނޑަޔާއި ދިވެހި މާގަނޑުމަސް އަދި އިތާމުތް އާލާކުރުމާއި، އާލާކުރާ ބާވަތްތަކަށް ޖެހޭ ބަލިތައް ދެނެގަނެ، ބަލިތަކުން ރައްކާތެރިކުރުމާ ބެހޭގޮތުން ބައިވެރިންނަށް ވަނީ މައުލޫމާތުދީފައެވެ.

އަދި މެރިކަލްޗަރ މަސައްކަތްތައް ކުރުމުގައި ތިމާވެއްޓަށް ގެއްލުން ކުޑަވާގޮތަށް އެ މަސައްކަތް ކުރުމާ ގުޅޭ ގޮތުން މައުލޫމާތުދިނުމުގެ އިތުރުން، ފާނަޔާއި ހުއިފިލަނޑާ އަދި މާގަނޑުމަސް އާލާކުރުމުގެ އަމަލީ ތަޖުރިބާ ކޯހުގެ ބައިވެރިންނަށް ފޯރުކޮށް ދީފައިވެއެވެ.

މި ފަހަރު ހިންގި ކޯހާ އެކީ މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމުގެ ދަށުން މިހާތަނަށް ޖުމުލަ 26 މީހަކު ތަމްރީނުކޮށްފައިވެއެވެ.