ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާ ހައްޔަރުކުރަން އިންޓަޕޮލްގެ "ރެޑް ނޯޓިސް" އަށް އެދެން ބަންގްލަދޭޝްގެ މިހާރު ސަރުކާރުން ނިންމާފައިވާ ކަމަށް އެގައުމުގެ ކަމާބެހޭ ފަރާތްތަކާ ހަވާލަދީ ނޫސްތަކުން ރިޕޯޓްކޮށްފިއެވެ.

ހަސީނާ ހައްޔަރު ކުރުމަށް އެދި އިންޓަޕޮލްގެ "ރެޑް ނޯޓިސް" ނެރެން ބަންގްލަދޭޝް ސަރުކާރުން ނިންމީ އޭނާ އާ ދެކޮޅަށް ކޮށްފައިވާ ތުހުމަތުތަކަށް ޖަވާބުދާރީ ކުރުމަށެވެ. ހަސީނާގެ އިތުރުން އޭނާގެ ސަރުކާރުގައި ހިމެނުނު މީހުންގެ ތެރެއިން މިހާރު ފިލައިގެން އުޅޭ އިތުރު ލީޑަރުން ހޯދަންވެސް އެގައުމުގެ ސަރުކާރުން ވަނީ އިންޓަޕޮލް މެދުވެރިކޮށް މަސައްކަތް ފަށާފައެވެ.

ހަސީނާގެ ސަރުކާރު ވައްޓާލައި ބަންގްލަދޭޝް އަށް އައި އިންތިގާލީ ސަރުކާރުގެ ގާނޫނީ މުޝީރު އާސިފް ނަޒްރުލް ވަނީ މުޒާހަރާތައް ހުއްޓުވަން މީހުންގެ ފުރާނަތައް ދުއްވާލި މީހުން އިންސާފުގެ ކުރިމައްޗަށް ގެންނާނެ ކަމަށް ވިދާޅުވެފައެވެ.

އާސިފް ނަޒްރުލް ވިދާޅުވީ ކުރީ ސަރުކާރުން މިއަހަރުގެ ޖުލައި މަހާއި އޮގަސްޓު މަހު ބޭއްވި ބޮޑެތި މުޒާހަރާތައް ހުއްޓުވަން ނުހައްގުން މީހުން މެރުމުގެ ޒިންމާ އުފުލަން ޖެހޭ މީހުން ކޮންމެ ތާކުން ހިމާޔަތް ހޯދައިގެން ތިއްބަސް އަނބުރާ ގެންނާނެ ކަމަށެވެ.

އެތައް އަހަރެއް ވަންދެން ބަންގްލަދޭޝްގައި ވެރިކަން ކޮށްފައިވާ ހަސީނާ މަގާމުން އިސްތިއުފާ ދޭން މަޖުބޫރުވި ހަމަނުޖެހުންތަކުގައި 700 އަށް ވުރެ ގިނަ މީހުން މަރުވިއެވެ. އެ ހަމަނުޖެހުންތަކުގެ ޒިންމާ ނަގަންޖެހޭނެ ކަމަށް ބެލެވޭ އެތައް ބަޔަކު ހަސީނާގެ ވެރިކަން ވެއްޓުމާ އެކު މިހާރުގެ ސަރުކާރުން ވަނީ ހައްޔަރުކޮށްފައެވެ.