ބަންގްލަދޭޝް ޓީމާއެކު އެކެވެރިކަމުގެ މެޗެއް ކުޅުމަށް ދިވެހި ގައުމީ ފުޓުބޯޅަ ޓީމު ބަންގާޅަށް ފުރައިފިއެވެ.

ގައުމީ ޓީމު ބަންގްލަދޭޝްއަށް ފުރާފައި ވަނީ މިއަދުގެ ވަގުތެއްގައެވެ. ބަންގްލަދޭޝް ޓީމާ ދެކޮޅަށް ގައުމީ ޓީމު ދެ މެޗެއް ކުޅެން ވަނީ ހަމަޖެހިފައެވެ.

މި މެޗުތަކަށް ނަގާފައިވާ ސްކޮޑްގައި ގިނަ އަދަދެއްގެ ޒުވާން ކުޅުންތެރިން ހިމެނެ އެވެ. މީގެ ތެރޭގައި 20 އަހަރުން ދަށުގެ ޓީމުގެ ތިން ކުޅުންތެރިންނާއި މާޒިއާގެ 14 ކުޅުންތެރިން ހިމެނެ އެވެ. މާޒިއާއަކީ ނިމުނު އޭއެފްސީ ޗެލެންޖް ކަޕްގައި ބައިވެރިވި ޓީމެވެ.

ބަންގްލަދޭޝް ޓީމާ ދެކޮޅަށް ކުޅޭ ދެ މެޗުވެސް ކުޅުމަށް ހަމަޖެހިފައިވަނީ އެގައުމުގެ ބަޝުންދަރާ ކިންގްސް އެރީނާގައި މި މަހުގެ 13 އަދި 16 ގައެވެ. މި މެޗުތަކަކީ ބަންގްލަދޭޝްއިން ވެސް މުހިއްމު ކަމެއް ދޭ މެޗުތަކެއްކަން ފާހަގަ ކުރެވެއެވެ.

ރާއްޖޭގައި ގައުމީ ފުޓްބޯޅަ ޓީމުގެ ސްކޮޑުގައި އަލަށް ފުރުސަތު ލިބުނު ކުޅުންތެރިންގެ ތެރޭގައި ހައިސަމް ރަޝީދާއި އަހްމަދު މާއިޝް ރަޝީދު ހިމެނެއެވެ.

ގައުމީ ޓީމުން މިފަދަ މެޗެއް ނުކުޅޭތާ އަހަރެއްހާ ދުވަސް ވެފައިވާއިރު އެންމެ ފަހުންވެސް ބައިނަލްއަޤްވާމީ މެޗެއް ކުޅެފައިވަނީ ވެސް ބަންގްލަދޭޝްއާ ދެކޮޅަށްކަން ފާހަގަ ކުރެވެއެވެ. އެއީ މިދިޔަ އަހަރުގެ އޮކްޓޯބަރުގައި ވޯލްޑް ކަޕް ކޮލިފައިން މެޗުތަކެވެ. އޭރު މާލޭގައި ކުޅުނު މެޗު 1-1 އިން އެއްވަރުވިއިރު، ބަންގްލަދޭޝްގައި ކުޅުނު މެޗުން އެ ގައުމުން ވަނީ 2-1 އިން ކާމިޔާބުކޮށްފައެވެ.

ބަންގްލަދޭޝްއާ ދެކޮޅަށް ރާއްޖެއިން ކުޅުނު މެޗުތަކުން އެންމެ ފަހުން ދިވެހި ޓީމު މޮޅުވެފައިވަނީ 2022 ވަނަ އަހަރު މާލޭގައި ކުޅުނު އެކުވެރިކަމުގެ މެޗެއްގައެވެ.